Zum Seiteninhalt

Il Grischun e Turitg profitan dal World Economic Forum (WEF) per la colliaziun d'interpresas en quai che concerna l'Asia

  • Erste Mitteilung
  • Neuen Beitrag einfügen
Communicaziun cuminaivla dals chantuns Grischun e Turitg a las medias

Ils chantuns Grischun e Turitg han manà tras ier saira a l'ur dal World Economic Forum (WEF) in'occurrenza per l'economia ch'è vegnida organisada da las duas direcziuns chantunals da l'economia publica. En in referat èn interpresas interessadas vegnidas infurmadas d'in expert davart las schanzas e las sfidas per interpresas svizras en ils martgads da l'Asia.

Mintga onn sa scuntran numerus represchentants impurtants da l'economia e da la politica la fin da schaner a Tavau al World Economic Forum (WEF). Ils chantuns Grischun e Turitg han infurmà ier saira a l'ur dal WEF interpresas interessadas davart las schanzas e las sfidas per interpresas svizras en ils martgads da l'Asia. A la tschaina d'interprendiders èn sa participads var 40 persunas sco er plirs cussegliers guvernativs dals chantuns Grischun e Turitg. Ils represchentants da las duas regenzas han profità da l'occurrenza per tgirar contacts cun represchentants da l'economia. 

Ils martgads creschents da l'Asia sco schanza per interpresas svizras 
Ils martgads creschents da l'Asia èn ina gronda schanza per interpresas svizras. Sch'ina interpresa sa decida d'entrar en il martgà da l'Asia, resultan da quai schanzas attractivas e lucrativas. Il medem mument na dastgan las sfidas però betg vegnir sutvalitadas. En ses referat infurmativ ha Kishore Mahbubani, professer da politologia e decan da la Lee Kuan Yew School of Public Policy a l'Universitad naziunala da Singapore, tractà las schanzas e las sfidas per interpresas svizras en ils differents martgads da l'Asia. Suenter il referat hai dà in barat d'ideas ed ina discussiun cun occasiun per far dumondas. 

Approfundar la collavuraziun dal Grischun e da Turitg 
Ils chantuns Grischun e Turitg han gia dapli blers onns ina collavuraziun buna e stretga, per exempel en il rom da la conferenza da las regenzas dals chantuns da la Svizra orientala. Cun la preschientscha cuminaivla al WEF vegn questa collavuraziun cumplettada d'in ulteriur chapitel e duai vegnir cuntinuada en l'avegnir. Las planisaziuns che curran actualmain per in parc d'innovaziuns naziunal cun Turitg sco lieu central e cun differents lieus affiliads porscha l'occasiun per ina collavuraziun anc pli stretga, per exempel en il sectur da las scienzas biologicas (life science). Turitg po offrir en quest connex cumpetenzas en il sectur da la tecnologia biologica e medicinala ed il Grischun po contribuir sco puncts centrals las applicaziuns en il sectur da la tecnologia medicinala. 
 

Persunas da contact per las medias:
Chantun Grischun:
- cusseglier guvernativ Hansjörg Trachsel, schef dal departament d'economia publica e fatgs socials, telefon 081 257 23 01, e-mail Hansjoerg.Trachsel@dvs.gr.ch  
- Eugen Arpagaus, manader da l'uffizi per economia e turissem dal Grischun, telefon 081 257 23 77, e-mail Eugen.Arpagaus@awt.gr.ch  

Chantun Turitg:
- pledadra da la regenza Susanne Sorg, telefon 043 259 59 00, e-mail Susanne.Sorg@sk.zh.ch  
  

Gremi: departament d'economia publica e fatgs socials dal Grischun
Funtauna: rg departament d'economia publica e fatgs socials dal Grischun
Neuer Artikel