Cuntegn da la pagina

La ARGE ALP publitgescha in premi da giuventetgna per la promoziun da la pasch

  • Erste Mitteilung
  • Neuen Beitrag einfügen
La Cuminanza da lavur da las regiuns alpinas, da la quala fa part er il Grischun, ha publitgà in premi tar la dumonda "Co pudain nus segirar la pasch?". Giuvenils èn envidads, 100 onns suenter il cumenzament da l'Emprima guerra mundiala, d'inoltrar contribuziuns litteraras e filmicas tar quest tema. Il premi importa tut en tut 15 000 euros.

L'onn 2014 èsi 100 onns che l'Emprima guerra mundiala è rutta ora. L'Emprima guerra mundiala ha midà l'istorgia da l'Europa ed ha instradà svilups globals. Sin tut il mund eran passa 70 milliuns umans pertutgads da la guerra, da quai 60 milliuns in Europa. Passa 9 milliuns schuldads e var 7 milliuns persunas civilas èn daventads sias victimas, tant en las confruntaziuns militaras directas sco er pervia da malsognas e fominas. Betg tut ils pajais da l'Europa n'eran pertutgads da medema maniera da la guerra. Grazia a sia neutralitad ed a la mobilisaziun da l'armada a l'occupaziun dals cunfins è la Svizra restada per gronda part intacta. 

Inoltrar texts u videos
In'Europa paschaivla è la premissa generala per bunas cundiziuns da viver e per crear ina basa solida per l'avegnir. Ma co po ina convivenza en pasch vegnir cuntanschida e mantegnida? Per promover ina cultura da la pasch assegna la Cuminanza da lavur da las regiuns alpinas (ARGE ALP) l'onn 2014 in premi da giuventetgna internaziunal. Umans giuvens tranter 15 e 20 onns da tut ils pajais federativs, da tut las regiuns e da tut ils chantuns da la ARGE ALP èn envidads da sa participar a questa occurrenza cun atgnas ovras. Tar la dumonda "Co pudain nus segirar la pasch?" pon vegnir inoltradas per la premiaziun lavurs en scrit, ma er videos ed autras lavurs da multimedia. Er contribuziuns cuminaivlas – per exempel d'ina classa da scola – dastgan vegnir inoltradas. Exclus da la concurrenza èn percunter ovras d'art, cudeschs e texts gia publitgads sco er lavurs premiadas a chaschun d'autras concurrenzas.
Il premi da la ARGE ALP vul animar ed encuraschar a reflectar e vul cuntanscher che giuvenils intermedieschian lur vista da la pasch a persunas da la medema vegliadetgna. Tge signifitga la pasch? Tge poss jau contribuir? Quant impurtant è per mai in cumportament plain respect e paschaivel en il mintgadi? Nua è periclitada mia integritad persunala? Stoss jau ma proteger? Questas e sumegliantas dumondas pon manar a las lavurs per la concurrenza.
Ina giuria da la ARGE ALP vegn a giuditgar davart la surdada dal premi. La premiaziun da las lavurs ha lieu a la conferenza dals schefs da las regenzas da la ARGE ALP la fin da zercladur 2014 a Trient (Italia). Las titularas ed ils titulars dal premi vegnan envidads a la premiaziun. La summa dals premis importa en tut 15 000 euros.
Giuvenils tranter 15 e 20 onns che vulessan sa participar a la concurrenza, ston s'annunziar fin il pli tard ils 28 da favrer 2014 sut info@argealp.org ed inditgar en quest connex lur num, la data da naschientscha ed il lieu da domicil. Las participantas ed ils participants ston ultra da quai inditgar en l'annunzia per tge categoria da lavurs (text u film/multimedia) ch'ellas ed els vulan inoltrar ina contribuziun. Las lavurs ston vegnir inoltradas fin il pli tard ils 18 d'avrigl 2014.
Ulteriuras infurmaziuns datti sut www.argealp.org

La ARGE ALP
La ARGE ALP sezza cultivescha ina vischinanza viva en pasch. Ses intent è quel d'approfundar la conscienza dad esser responsabel per il spazi da viver alpin, ed ella vul sviluppar vinavant questa conscienza en moda persistenta per il bain da las abitantas e dals abitants. A la cuminanza da lavur, ch'è vegnida fundada l'onn 1972 en il Tirol, appartegnan diesch pajais federativs, regiuns e chantuns da quatter stadis. Commembers èn ils chantuns svizzers Grischun, Son Gagl e Tessin, ils pajais federativs austriacs Salzburg, Tirol e Vorarlberg, il pajais federativ tudestg Baviera sco er las regiuns talianas Tirol dal Sid, Trient e Lumbardia. Presidiada vegn la ARGE ALP mintgamai per in onn d'in da ses commembers. Actualmain è quai il Trentino. 
 

Infurmaziuns:
Luzi Bürkli, incumbensà per l'infurmaziun dal chantun Grischun, tel. 081 257 22 47, e-mail luzi.buerkli@staka.gr.ch  
 

Gremi: cuminanza da lavur da las regiuns alpinas
Funtauna: rg chanzlia chantunala dal Grischun
Neuer Artikel