Zum Seiteninhalt

Midadas tar ils glatschers en il Grischun: pussaivladad da consultar chartas en l'internet

  • Erste Mitteilung
  • Neuen Beitrag einfügen
Dapi passa 100 onns mesira il servetsch forestal dal chantun Grischun las posiziuns da las lieungas da differents glatschers. Questas serias da mesiraziuns unicas pon vegnir consultadas da nov sin ina charta interactiva en l'internet.

Glatschers fascineschan – ed els èn fitg impurtants tant dal puntg da vista scientific sco er economic. Fluctuaziuns tar glatschers valan sco in dals megliers indizis per identifitgar midadas dal clima. Ils glatschers èn reservuars d'aua e giogan sco tals ina rolla impurtanta per il diever economic (aua da baiver, producziun d'electricitad) e per la valitaziun dal privel d'aua gronda. Ultra da quai han ils munds glazials impressiunants er per il turissem ina muntada che na dastga betg vegnir sutvalitada.

Las collavuraturas ed ils collavuraturs da l'uffizi da guaud e privels da la natira (UGP) mesiran mintga onn las lieungas da differents glatschers sin il territori grischun. Grazia a questas mesiraziuns existan per passa 20 glatschers en il chantun Grischun serias da mesiraziuns che cumpiglian per part bler dapli che 100 onns. Quests resultats unics vegnan integrads en la perscrutaziun actuala davart ils glatschers e davart il clima e servan tranter auter a verifitgar models u ad analisar signals climatics. Els vegnan dentant er duvrads per giuditgar las consequenzas directas ed indirectas che las midadas tar il glatschers han per l'ambient.

Ils glatschers ch'èn vegnids mesirads en il Grischun vegnan preschentads da nov en ina charta interactiva. Tar mintga glatscher mesirà pon ins ultra da quai consultar ina pitschna documentaziun cun maletgs istorics ed actuals. Link a la charta interactiva: http://map.geo.gr.ch/gletscher (duvrar il buttun "i" en la trav da simbols per survegnir infurmaziuns davart ils glatschers).
 

Infurmaziuns:
Andreas Huwiler, uffizi da guaud e privels da la natira dal Grischun, tel. 081 257 38 67, telefon mobil 079 270 91 49, e-mail Andreas.Huwiler@awn.gr.ch  
 

Gremi: uffizi da guaud e privels da la natira dal Grischun
Funtauna: rg uffizi da guaud e privels da la natira dal Grischun
Neuer Artikel