Zum Seiteninhalt

Communicaziun da la regenza dals 30 da schaner 2014

  • Erste Mitteilung
  • Neuen Beitrag einfügen
La regenza grischuna suttametta a la confederaziun ina proposta per laschar avertas las butias las dumengias en las regiuns turisticas. Plinavant sa stenta la regenza da mantegnair l'agentura consulara taliana a Cuira.

Il sboz da la confederaziun per laschar avertas las butias las dumengias sto vegnir repassà
Ademplind ina incumbensa parlamentara ha la confederaziun preschentà in sboz per in'ordinaziun che regla l'avertura da las butias las dumengias en territoris da turissem. Tenor quest sboz duain centers da cumpra che servan als basegns dal turissem internaziunal dastgar occupar lavurantas e lavurants senza ina permissiun las dumengias durant tut l'onn. En sia posiziun a la confederaziun suttametta la regenza grischuna propostas per midadas essenzialas che han l'intent d'adattar l'ordinaziun pli fitg als basegns ed a las relaziuns turisticas actualas.
La disposiziun excepziunala vertenta, tenor la quala ils manaschis en regiuns turisticas che servan a satisfar a basegns specifics da las turistas e dals turists, dastgan occupar lavurantas e lavurants las dumengias, na duai betg vegnir extendida mo per singuls centers da cumpra, sco quai ch'i vegn proponì da la confederaziun, mabain cumpigliar tut ils centers da cumpra en regiuns turisticas, ch'èn sezs ina purschida turistica en il senn d'in "shopping" e che fan lur gudogn per ina gronda part cun las turistas ed ils turists. Far cumpras tutga oz tar ils motivs ils pli impurtants per in viadi en Svizra e vegn resguardà sco eveniment. Il shopping è pia in grond basegn turistic. Plinavant sto vegnir repassada la definiziun da las regiuns turisticas ch'è fixada en l'ordinaziun. Tenor la proposta da la regenza sto vegnir consultada per quest intent la legislaziun federala davart la promoziun d'alloschaments vertenta. Tenor quella vala explicitamain tut il chantun Grischun sco regiun turistica.
Senza resalvas vegn sustegnida l'aboliziun da la limitaziun vertenta da dumengias da vendita tenor stagiuns. Ozendi sa stenta il turissem da reducir las variaziuns stagiunalas. Per consequenza daventi adina pli difficil da definir stagiuns.

Futur da l'agentura consulara taliana: la regenza scriva ina brev a la ministra da l'exteriur
La regenza grischuna s'engascha per mantegnair l'agentura consulara taliana a Cuira. En ina brev a la ministra da l'exteriur da l'Italia Emma Bonino punctuescha ella la gronda impurtanza da l'agentura consulara taliana en la chapitala dal Grischun tant per las var 10 000 burgaisas talianas e burgais talians en il Grischun sco er per il chantun Grischun sez. La regenza dumonda il ministeri da l'exteriur talian da mantegnair l'agentura consulara a Cuira e perquai d'examinar per entant alternativas per la serrada intenziunada dal consulat a Son Gagl. La serrada dal consulat a Son Gagl pudess numnadamain er avair consequenzas per l'agentura consulara a Cuira – l'agentura consulara a Cuira vegn assistida da collavuraturas e collavuraturs dal consulat a Son Gagl.
Ord vista da la regenza grischuna fiss la serrada da las plazzas a Son Gagl ed a Cuira ina gronda perdita. Las burgaisas ed ils burgais da l'Italia che vivan en il Grischun stuessan far quint cun viadis nunraschunaivels per reglar fatschentas uffizialas. Er per interpresas pitschnas e mesaunas sco er per bleras cunfinarias e per blers cunfinaris è ina partiziun consulara en il Grischun in post da contact impurtant. E betg sco ultim fa l'agentura consulara taliana a Cuira er gronds servetschs per intermediar la cultura taliana en il Grischun.

Tariffa da basa pli auta per medias e medis en praticas grischunas
Las medias ed ils medis en praticas grischunas pon metter a quint dapli per lur prestaziuns. La regenza ha approvà ina cunvegna tranter la tarifsuisse sa e las societads da las medias e dals medis dals chantuns Grischun, Glaruna, Son Gagl, Turgovia, ils dus Appenzell e Schaffusa per augmentar la valur dals puncts da taxa da Tarmed. Da nov importa la valur dals puncts da taxa 83 raps (fin ussa: 82 raps). Per las assicuranzas en il Grischun munta quai in augment dals custs da circa 1,34 milliuns francs, per las persunas che pajan las premias in augment da las premias da 0,37 pertschient. En ses giudicament ha la regenza tratg la conclusiun che la nova valur dals puncts da taxa dad 83 raps saja supportabla en vista a las consequenzas per las premias.


Da vischnancas e da regiuns
  • Cunter: La revisiun totala da la planisaziun locala, concludida da la vischnanca da Cunter ils 29 da november 2012, vegn approvada cun resalvas. Tras il repassament total da la planisaziun d'utilisaziun èn vegnidas fatgas tranter auter novas enzonaziuns en la zona centrala ed en la zona d'abitar 2 da totalmain 1,65 hectaras. Ultra da quai vegn extendida la zona da mastergn per lung da la Gelgia per 1,065 hectaras. I manca per quai anc la determinaziun da la zona d'auas en la planisaziun d'utilisaziun.
  • Scharans: La revisiun parziala da la constituziun communala da la vischnanca da Scharans dals 29 da november 2013 vegn approvada. La revisiun parziala cuntegna principalmain l'adattaziun da differentas disposiziuns al dretg surordinà. Ultra da quai survegn la suprastanza communala dapli cumpetenzas finanzialas.

Gremi: regenza
Funtauna: rg chanzlia chantunala dal Grischun
Neuer Artikel