Zum Seiteninhalt

Ils lufs dal Calanda vegnan "tschiffads" cun traplas fotograficas

  • Erste Mitteilung
  • Neuen Beitrag einfügen
Dapi dus onns e mez vivan lufs en il territori dal Calanda e dal massiv dal Piz Bargias. En il fratemp èn els er sa reproducids. Quest enviern han els extendì lur territori da chatscha sin las vischnancas al sid dal Rain (Panaduz, Razén e Domat).

Per pussibilitar che l'uman ed il luf possian viver ensemen senza incaps ston ils effectivs dals lufs vegnir survegliads permanentamain. Mo uschia èsi pussaivel da percorscher ad ura svilups negativs imminents e da far frunt ad eventuals problems. Questa lavur – numnadamain il monitoring dals lufs – sto pudair sa basar en mintga cas sin fatgs objectivs. Ils guardiaselvaschinas da l'uffizi da chatscha e pestga dal Grischun e da l'uffizi per natira, chatscha e pestga da Son Gagl fan consequentamain questa lavur dapi l'immigraziun dals lufs e dovran per quai – ultra da la surveglianza ora en la natira – er regularmain traplas fotograficas. Questas traplas fotograficas èn tuttas etichettadas correspundentamain. Eventualas fotografias da persunas vegnan stizzadas immediatamain.

Durant la fin da quest enviern e questa primavaira realisescha la KORA (projects da perscrutaziun coordinads per ils animals da rapina en Svizra) per incumbensa da l'uffizi federal d'ambient (UFAM), partiziun "spezias, sistems ecologics, cuntradas", in project da pilot en il territori dals "lufs dal Calanda" cun l'intent da sviluppar vinavant il monitoring dals lufs en Svizra. En quest connex vegnan messas 25 fin 30 traplas fotograficas, repartidas sin tut il territori dal massiv dal Calanda e dal Piz Bargias tenor in plan d'experiment precis ch'è vegnì elavurà scientificamain. Las traplas fotograficas èn etichettadas cun l'adressa da l'incumbensader. Cun plazzar las traplas fotograficas vegnan respectadas las zonas da paus per la selvaschina.

Questas traplas fotograficas èn vegnidas messas en funcziun durant las ultimas emnas. La populaziun vegn appellada da sustegnair cun bainvulientscha quest project. Las enconuschientschas fatgas servan la finala a la publicitad e gidan ad evitar conflicts tranter l'uman ed il luf. Ils guardiaselvaschinas prendan gugent encunter eventualas observaziuns da la populaziun e stattan a disposiziun per dumondas. 
 

Fotografias agiuntadas: Trapla fotografica montada ed etichettada


Plirs lufs "tschiffads"
 

Infurmaziuns:
- dr. Georg Brosi, manader da l'uffizi da chatscha e pestga dal Grischun, tel. 081 257 38 92, e-mail georg.brosi@ajf.gr.ch  
- Hannes Jenny, biolog da selvaschina, uffizi da chatscha e pestga dal Grischun, tel. 081 257 38 92, e-mail hannes.jenny@ajf.gr.ch  
 

Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel