Cuntegn da la pagina

Communicaziun da la regenza dals 13 da mars 2014

  • Erste Mitteilung
  • Neuen Beitrag einfügen
La regenza grischuna beneventa las tractativas per ina cunvegna da cunfinarias e da cunfinaris cun l'Italia. Ultra da quai ha la regenza approvà in project per ina cussegliaziun al telefon da geniturs e da persunas cun la pussanza dals geniturs che sa chattan en situaziuns da conflict. Plinavant ha ella concludì ch'il chantun sa participeschia ad in'enquista da mobilitad l'onn proxim. 

La regenza beneventa las tractativas per ina nova cunvegna da cunfinarias e da cunfinaris cun l'Italia
La regenza grischuna renconuscha la necessitad d'adattar la regulaziun da cunfinarias e da cunfinaris cun l'Italia. Sco ch'ella scriva en sia resposta ad ina brev averta da la deputada grischuna Nicoletta Noi-Togni èn vegnidas iniziadas tractativas tranter la confederaziun e l'Italia. Sin ils resultats da quellas ston ins ussa spetgar. Il chantun Grischun è represchentà en la delegaziun svizra da tractativa tras l'administraziun da taglia. Ina soluziun betg cunvegnenta è ord vista da la regenza grischuna da desdir la cunvegna da cunfinarias e da cunfinaris vertenta cun l'Italia. Ina iniziativa correspundenta dal chantun Tessin na vegn betg sustegnida da la regenza grischuna. La regenza è da l'opiniun che la desditga da la regulaziun da cunfinarias e da cunfinaris vertenta possia chaschunar difficultads considerablas, perquai ch'il resultat da las tractativas davart ina nova regulaziun è absolutamain intschert. 

Clom d'urgenza per geniturs er per il chantun Grischun
Er la populaziun dal Grischun duai pudair duvrar en l'avegnir in clom d'urgenza per geniturs. La regenza ha approvà ina cunvegna da prestaziun cun l'uniun "Clom d'urgenza per geniturs" che dura trais onns ed ha deliberà per quai 91 500 francs. Sut il numer da telefon 0848 35 45 55 (tariffa da la rait fixa) maina l'uniun nà da Turitg in clom d'urgenza permanent per geniturs u per persunas da referiment d'uffants e da giuvenils da mintga vegliadetgna. Durant 365 dis ad onn pon geniturs dumandar agid tar il clom d'urgenza en cas da situaziuns da surpretensiun educativa, da conflicts, da crisas u da violenza. Ultra da la cussegliaziun per telefon vegn er renvià en cas da basegn a posts spezialisads en la vischinanza da las persunas pertutgadas. Da questa purschida profitan gia oz plirs chantuns. Il clom d'urgenza per geniturs duai cumplettar la purschida da cussegliaziun per geniturs existenta dal chantun Grischun. 

Enquista davart la mobilitad en preparaziun
Il chantun Grischun sa participescha l'onn 2015 puspè ad in'enquista naziunala davart il cumportament en il traffic da la populaziun. La regenza ha prendì enconuschientscha dal project cun il titel "Microcensus mobilitad e traffic 2015 dal chantun Grischun". Il project furnescha ina da las basas las pli impurtantas da datas per preparar differentas decisiuns da la politica da traffic. Ma er per la planisaziun dal territori èn las infurmaziuns davart la mobilitad da persunas da gronda impurtanza. L'enquista davart il cumportament en il traffic vegn fatga mintga 5 onns. En quest connex vegn in tschert di da referenza fatga ina vasta enquista en la populaziun davart ils meds da traffic duvrads, davart las distanzas fatgas sco er davart ils temps da partenza e d'arriv. En spezial vegnan eruidas las decisiuns davart la tscherna dal med da traffic e da la ruta. La participaziun al project da l'onn 2015 vegn a custar il Grischun tut en tut 70 000 francs. 

La refurma da l'imposiziun da taglia sin interpresas III vegn beneventada da princip
La regenza grischuna renconuscha il basegn da refurma tar l'imposiziun da taglia sin interpresas. Sco ch'ella punctuescha sco cumplettaziun tar ina posiziun da la conferenza da las directuras e dals directurs chantunals da finanzas davart la refurma da l'imposiziun da taglia sin interpresas III en la consultaziun a la confederaziun, sto la refurma vegnir concepida uschia ch'in bun cumpromiss po vegnir chattà tranter ina Svizra sco lieu fiscal attractiv e la cumpatibilitad dal dretg fiscal cun prescripziuns internaziunalas vertentas. En quest connex stoi vegnir fatg attenziun or da l'optica da la regenza ch'i na vegnian betg sacrifitgads avantatgs mo d'ina vart. Las mesiras proponidas da la confederaziun paran d'esser adattadas per evitar u almain per minimar eventuals donns per la Svizra sco lieu economic, er sche la concepziun concreta da las mesiras inclusiv las consequenzas finanzialas èn anc avertas er per ils chantuns. 
 

Da vischnancas e da regiuns 
  • Vaz: Il plan da zonas 1:2500 "Revisiun parziala Valbella" ch'è vegnì concludì da la vischnanca da Vaz ils 25 da november 2012 vegn approvà concernent la zona per il sport d'enviern en il sectur da la staziun da la teleferica da colliaziun. Cun quai èn stgaffidas las premissas da la planisaziun d'utilisaziun per l'implant planisà d'ina pendiculara "Heimberg – Proschieri" er sin territori communal da Vaz. La dumonda da concessiun correspundenta da las Telefericas Lai SA sa chatta actualmain tar l'uffizi federal da traffic.
  • Valsot: La revisiun parziala da la planisaziun locala concludida da l'anteriura vischnanca da Tschlin (en il fratemp fusiunada a la vischnanca da Valsot) ils 26 da november 2012 vegn approvada cun resalvas. Cun la planisaziun d'utilisaziun vegn stgaffida ina nova zona d'abitar "Chaflur" en il territori "Prà da las Vals / Tulai". La zona d'abitar "Chaflur" vegn approvada mo en quai che reguarda las parcellas nr. 3617, 4337 e 4684. Quai correspunda a circa dus terzs da la surfatscha che l'anteriura vischnanca da Tschlin aveva concludì oriundamain. Cun la limitaziun duai vegnir evità ch'ils dus abitadis da Chaflur e da Strada che sa preschentan fin ussa sco abitadis independents creschian ensemen opticamain.
  • Murmarera, Mut: Las revisiuns parzialas da las leschas da taglia da las vischnancas da Murmarera e da Mut vegnan approvadas. Las disposiziuns midadas pertutgan – en il cas da la vischnanca da Murmarera – il subject da taglia tar la taglia sin successiun d'ierta e sin donaziuns ed – en il cas da la vischnanca da Mut – las tariffas da taglia tar la taglia sin midada da maun e sin immobiglias.
  • Scanvetg central: La lescha da taglia dal cumin-baselgia evangelic refurmà dal Scanvetg central (fusiun dals cumins-baselgia da St. Peter/Pagig, Molinis, Peist e Castiel/Calfreisen/Lüen) dal 1. d'october 2013 vegn approvada. 

Projects da vias
Il project d'exposiziun per curreger il traject Chera – serenera Versomi da la via sursilvana da la vart dretga dal Rain vegn approvà. La restructuraziun da la via sursilvana da la vart dretga dal Rain è urgentamain necessaria per motivs da la segirezza dal traffic. Grazia a l'avertura da la nova punt sur la chavorgia da Versomi l'onn 2012 ha pudì vegnir dauzada la limitaziun dal pais da 13 a 32 tonnas. L'augment dal traffic pesant pervia da l'auzament da la tonnascha giustifitgescha l'engrondiment a dus vials cun ina surstructura solida da catram. Ed in meglier trassé da la via gida ad augmentar la segirezza dal traffic. La correcziun da la via cumenza ca. 150 meters suenter la punt sur la Rabiusa e finescha ca. 150 meters sur la serenera da Versomi tar il traject Unterhof – Versomi ch'è gia vegnì restructurà. La lunghezza da la correcziun importa 884 meters.

Ultra da quai ha la regenza approvà 2,967 milliuns francs per lavurs da construcziun sin ils suandants trajects:
- via dal Schin: lavurs d'impressari e da cuvrida, bova tar il Cugnieler-/Caselertobel
- via sursilvana: lavurs d'impressari e da cuvrida, punt a spunda Gonda
- via da l'Alvra: lavurs d'impressari e da cuvrida, punt sur la Viafier retica a Naz 


Gremi: regenza
Funtauna: rg chanzlia chantunala dal Grischun
Neuer Artikel