La Cuminanza da lavur da las regiuns alpinas envida ils giuvenils, 100 onns suenter il cumenzament da l'emprima guerra mundiala, da s'occupar en contribuziuns da text e da film da la dumonda: "Co pudain nus garantir la pasch?" Las contribuziuns da concurrenza pon vegnir inoltradas fin mez avrigl 2014 en l'internet sut www.argealp.org.

Per promover ina cultura da la pasch surdat la Cuminanza da lavur da las regiuns alpinas (ARGE ALP) 100 onns suenter il cumenzament da l'emprima guerra mundiala in premi da giuventetgna internaziunal. Tschertgadas e premiadas vegnan lavurs en scrit, dentant er videos ed autras lavurs da multimedia davart la dumonda "Co pudain nus garantir la pasch?" Sa participar a la concurrenza pon giuvenils da la vegliadetgna tranter 15 fin 20 onns. Per quest intent ston els sa registrar, inditgond lur num, lur vegliadetgna e lur domicil, sut www.argealp.org. Suenter lur registraziun pon vegnir inoltradas las contribuziuns da concurrenza al medem lieu fin il pli tard venderdi, ils 18 d'avrigl 2014. Videos cun in volumen che na surpassa betg 200 megabytes pon vegnir chargiads en ils formats .mp4, .mov, .avi e .mpg. Pussaivlas èn er lavurs da gruppa – p.ex. da classas da scola. Ina giuria da la ARGE ALP vegn a decider en las duas categorias (text e film) davart ils premis. Las persunas premiadas vegnan envidadas la fin da zercladur 2014 a Trento (Italia) per la surdada dals premis. La summa dal premi importa en total 15 000 euros. Il premi da la ARGE ALP vul cuntanscher che giuvenils intermedieschian lur vista da la pasch a persunas da la medema vegliadetgna. Ulteriuras infurmaziuns davart il premi datti sut www.argealp.org. 
 

Infurmaziuns:
Luzi Bürkli, incumbensà per l'infurmaziun dal chantun Grischun, tel. 081 257 22 47, e-mail luzi.buerkli@staka.gr.ch  
 

Gremi: Cuminanza da lavur da las regiuns alpinas
Funtauna: rg chanzlia chantunala dal Grischun