Navigaziun principala

Cuntegn da la pagina

Communicaziun da la regenza dals 27 da mars 2014

  • Erste Mitteilung
  • Neuen Beitrag einfügen
La regenza ha fixà la data per la votaziun dal pievel davart la refurma da la gulivaziun da finanzas (refurma da la GF). Ultra da quai ha ella tractà projects da la confederaziun – uschia quels da l'imposiziun da la taglia a la funtauna e da la prevenziun da vegliadetgna. 

La votaziun davart la refurma da la GF ha lieu ils 28 da settember 2014
Il referendum dal pievel ed il referendum da las vischnancas cunter il conclus dal cussegl grond concernent il relasch da la lescha davart la refurma da la gulivaziun da finanzas en il chantun Grischun (lescha generala davart la refurma da la GF) èn reussids cun 1998 suttascripziuns valaivlas resp. cun 19 vischnancas sustegnentas. Sin conclus da la regenza ha la votaziun dal pievel davart la refurma da la GF lieu ils 28 da settember 2014.
Tuts dus referendums èn vegnids inoltrads ils 18 da mars 2014. In referendum dal pievel en connex cun in relasch, cun ina midada u cun ina aboliziun d'ina lescha dovra almain 1500 suttascripziuns. Il referendum da las vischnancas sto vegnir sustegnì d'almain in dieschavel da las vischnancas dal Grischun (actualmain en tut 146 vischnancas). El vegn fatg, uschenavant ch'il dretg communal na cuntegna naginas regulaziuns divergentas, cun conclus concordants da las suprastanzas communalas. 

La revisiun da l'imposiziun da la taglia a la funtauna sto vegnir repassada
La regenza grischuna sustegna da princip la revisiun da l'imposiziun da la taglia a la funtauna sin plaun federal. La finamira da la revisiun è quella d'eliminar ils tractaments ineguals da lavurantas e da lavurants esters. Sco quai che la regenza punctuescha en sia posiziun a la confederaziun sto il sboz da revisiun però vegnir adattà. Uschia duai la limita actuala da las entradas minimalas da 120 000 francs vegnir mantegnida tar l'imposiziun da la taglia a la funtauna, cur ch'i vegn fatga ina taxaziun ordinaria posteriura. La confederaziun vul sbassar questa limita a 65 000 francs. En il chantun Grischun vegnissan 20 000 persunas ch'èn obligadas da pajar la taglia a la funtauna suttamessas uschia ad ina taxaziun ordinaria posteriura. Da quai resultassan custs administrativs per il chantun en la dimensiun dad 1,25 milliuns francs. Ultra da quai datti tenor il dretg nov la pussaivladad da dumandar ina taxaziun ordinaria posteriura (per persunas "indigenas" u "quasi indigenas").
La taglia a la funtauna è ina taglia che vegn deducida directamain da las entradas. La deducziun vegn fatga da la patruna u dal patrun d'ina lavuranta u d'in lavurant che n'ha betg ina permissiun da domicil en Svizra. 

La refurma da la prevenziun da vegliadetgna 2020 vegn beneventada
La refurma da la prevenziun da vegliadetgna 2020, che vegn proponida da la confederaziun, vegn da princip beneventada da la regenza grischuna. La finamira dal project da refurma da mantegnair il nivel da prestaziun en la prevenziun da vegliadetgna vegn beneventà explicitamain. Reducziuns da las prestaziuns en il sectur da l'incumbensa constituziunala da segirar l'existenza na dastgan – or da l'optica da la regenza grischuna – betg vegnir fatgas. Sco che la regenza scriva en sia posiziun a la confederaziun na cuntegna il pachet da refurma displaschaivlamain naginas propostas concretas per la refurma necessaria da las prestaziuns supplementaras. Quellas fissan beneventablas, independentamain da la refurma necessaria da la lescha federala davart las prestaziuns supplementaras.
La regenza renconuscha però il basegn d'ina finanziaziun supplementara sur la taglia sin la plivalur ch'exista tar l'assicuranza per vegls e survivents (AVS). Actualmain è però mo deliberà in augment per 1 pertschient da la taglia sin la plivalur. Il segund pertschient da la taglia sin la plivalur duai vegnir incassà pir, sche quai è urgentamain necessari.
Cun la refurma da la prevenziun da vegliadetgna 2020 vul la confederaziun introducir tranter auter ina vegliadetgna da renta da 65 onns per umens e per dunnas, pussibilitar ina concepziun flexibla dal pensiunament sco er adattar las prestaziuns e las contribuziuns als svilups da la societad. 

Las directivas davart saivs cunter selvaschina vegnan menziunadas da nov en in'ordinaziun
L'ordinaziun per prevegnir ed indemnisar donns da selvaschina en l'agricultura è vegnida adattada da la regenza. Da nov vegnan menziunadas en l'ordinaziun las directivas decisivas per far saivs cunter tschiervs e cunter chavriels. Ultra da quai vegnan simplifitgads ils andaments da procedura stritgond en l'ordinaziun ch'ils termins per inoltrar ina dumonda da survegnir ina contribuziun per prevegnir cunter donns da selvaschina èn vegnids.
Da princip paja il chantun ils donns che la selvaschina ed ils capricorns fan vi da culturas agriculas. Il dretg da survegnir ina indemnisaziun po però crudar davent u vegnir reducì, sche la persuna donnegiada n'ha betg prendì las mesiras da defensiun pretendiblas e fixadas en il dretg chantunal da chatscha. 
 

Contribuziuns chantunalas a differentas instituziuns 
  • Fundaziun per il servetsch da pedagogia curativa dal Grischun: Per adattar e per renovar il secretariat da la fundaziun dal servetsch da pedagogia curativa dal Grischun a Cuira vegn garantida ina contribuziun da construcziun da maximalmain 291 680 francs. I vegnan stgaffidas plazzas da lavur da biro sco er exequidas differentas lavurs da mantegniment e da renovaziun.

Projects da vias
La regenza ha approvà 11,3 milliuns francs per lavurs da construcziun sin ils suandants trajects:
- via da la Chlus: lavurs d'impressari e da cuvrida, sutpassadi da la Viafier retica a Pardisla
- via taliana: lavurs da construcziun en metal e d'anticorrusiun en connex cun la renovaziun da la punt sur il Rain a Rehanau
- via da la Lumnezia: lavurs d'impressari, St. Martin – Quadra
- via dal Lucmagn: lavurs d'impressari, Stgegia
- via da Luven: lavurs d'impressari, Starpuns – Luven
- via sursilvana: lavurs d'impressari, correcziun da la via, Lumneins
- via da Surcuolm: lavurs d'impressari, Valata – Surcuolm en il vitg 
 

Gremi: regenza
Funtauna: rg chanzlia chantunala dal Grischun
Neuer Artikel