Cuntegn da la pagina

Vernissascha dal cudesch: Fermas figuras femininas ans accumpognan sco fil cotschen tras l'ovra da Silvia Andrea

  • Erste Mitteilung
  • Neuen Beitrag einfügen
A chaschun dal giubileum da 150 onns Villa Garbald a Castasegna ha il cussegl da fundaziun da la fundaziun Garbald puspè rendì accessibla ina schelta d'ovras da Silvia Andrea. L'ediziun che cumpiglia 4 toms è vegnida realisada grazia al grond sustegn dal chantun Grischun. Las ovras vegnan ussa preschentadas ed undradas en ina vernissascha en la biblioteca chantunala dal Grischun a Cuira.

Silvia Andrea è in pseudonim da l'autura grischuna Johanna Garbald-Gredig (1840-1935). Ses romans e texts da prosa istorics davart differentas epocas da l'istorgia grischuna èn stads fitg appreziads. Però er ses requints curts e precis ch'ella ha publitgà en emprima lingia en revistas litteraras han chattà gronda accoglientscha. Silvia Andrea è stada enconuschenta da ses temp lunsch sur ils cunfins da ses chantun d'origin or. Sco in fil cotschen ans accumpognan fermas figuras femininas tras sia ovra. Per l'ediziun cumpletta "Silvia Andrea: Ausgewählte Werke in vier Bänden" segnan sco responsablas la manadra da la biblioteca chantunala dal Grischun deplorablamain defuncta dacurt, Christine Holliger sco er Maya Widmer, incumbensada per dumondas d'egualitad da la promoziun da la perscrutaziun dal Fond naziunal svizzer FNS / scienziada litterarara.
Johanna Garbald-Gredig e ses consort, il directur da duana da la Bregaglia Agostino Garbald, han laschà concepir Gottfried Semper, l'architect da l'edifizi principal da la SPF a Turitg, lur nov dachasa, la "Villa Garbald" da pli tard. Tar il relasch da la famiglia Garbald tutga ultra da quai ina biblioteca che cumpiglia 2000 toms. Quella è vegnida ordinada e cataloghisada sistematicamain sut la direcziun da la biblioteca chantunala dal Grischun e po vegnir consultada sin dumonda en la Villa Garbald a Castasegna. 
 
L'ediziun cumpiglia las 4 suandantas publicaziuns: 
- Silvia Andrea: Violanta Prevosti. Roman istoric. Ed. e cun epilog da Maya Widmer. Chasa editura Chronos, 2014.
- Silvia Andrea: Das Bergell. Wanderungen in der Landschaft und ihrer Geschichte. Cun in epilog da Gian Andrea Walther. Chasa editura Chronos, 2014.
- Silvia Andrea: Faustine. Roman. Ed. e cun in commentari da Cordula Seger. Chasa editura Chronos, 2014.
- Silvia Andrea: Das eigene Ich und die grosse Welt. Texts da prosa e biografics. Chasa editura Chronos, 2014. 
 
Vernissascha dal cudesch:

mesemna, ils 9 d'avrigl 2014, a las 18.00, en la biblioteca chantunala dal Grischun, Karlihofplatz, Cuira 
 
 
Agiuntas:
- prevista da la chasa editura Chronos cun infurmaziuns supplementaras tar ils toms
- cover d'ina publicaziun 
 

Infurmaziuns:
- Vreni Müller-Hemmi, presidenta da la fundaziun Garbald, tel. 079 357 43 92, e-mail mueller-hemmi@garbald.ch 
- Andri Janett, biblioteca chantunala dal Grischun, tel. 081 257 28 22 u 078 621 40 41, e-mail: andri.janett@kbg.gr.ch 
 

Gremi: Biblioteca chantunala dal Grischun
Funtauna: rg biblioteca chantunala dal Grischun
Neuer Artikel