Sut www.alter.gr.ch metta l'uffizi chantunal da sanadad a disposiziun infurmaziuns davart il tema da la vegliadetgna. Ultra da quai porscha quest portal d'internet tant ad organisaziuns sco er a regiuns la pussaivladad da sa colliar.

Dumagnar las sfidas demograficas sco er metter a disposiziun purschidas novas e cumplessivas che sa drizzan ad ina generaziun activa 60plus – quai vul il model directiv pertutgant la vegliadetgna dal Grischun 2012 che la regenza grischuna ha deliberà il favrer 2012. Ina da las finamiras dal model directiv pertutgant la vegliadetgna è ina infurmaziun che correspunda als basegns da las persunas che s'interessan per dumondas da la vegliadetgna e per purschidas da tgira e d'assistenza. Per quest intent duai il chantun endrizzar in portal d'internet, nua che las organisaziuns ch'èn activas en il Grischun mettan lur link ed infurmaziuns che stattan en connex cun il tema da la vegliadetgna sco er infurmaziuns davart las differentas purschidas.
L'uffizi da sanadad dal Grischun ha ussa realisà questa mesira. Sut www.alter.gr.ch chattan umans pli vegls, lur confamigliars, las vischnancas e tut ils circuls che s'interessan per il tema da la vegliadetgna infurmaziuns tranter auter concernent l'abitar, la tgira e l'assistenza, la promoziun da la sanadad e las finanzas. La structura dal portal d'internet vegn messa a disposiziun sco previs a las regiuns, per ch'ellas possian infurmar davart lur atgnas purschidas e davart la realisaziun da lur strategia regiunala concernent la vegliadetgna. En il senn d'ina regiun da pilot è la regiun da l'Engiadina bassa gia preschenta en la rait. Las autras regiuns èn envidadas er da sa participar al portal.
Il tema da la vegliadetgna è in tema che concerna tut las generaziuns e che pertutga baud u tard tut ils umans. Tgi che vul sa participar activamain a la discussiun da dumondas da la vegliadetgna ha la pussaivladad da sa metter en contact cun l'uffizi da sanadad dal Grischun e da communitgar ses giavischs. In forum da discussiun sco er in blog vegnan preparads e vegnan a porscher la pussaivladad da sa barattar er tranter las generaziuns.

Portal d'internet: www.alter.gr.ch  


Infurmaziuns:
dr. Rudolf Leuthold, manader da l'uffizi da sanadad dal Grischun, tel. 081 257 26 41, e-mail rudolf.leuthold@san.gr.ch  


Gremi: Uffizi da sanadad dal Grischun
Funtauna: rg uffizi da sanadad dal Grischun