Dacurt ha la regenza grischuna approvà las concessiuns che las vischnancas da Puschlav, da Brusio e da Puntraschigna han dà a la Repower SA per manar vinavant e per engrondir ils implants idraulics en il Puschlav.
Il project "Lagobianco"
L'element central dal project "Lagobianco" è la construcziun d'ina ovra d'accumulaziun a pumpa tranter il Lago di Poschiavo ed il Lago Bianco. Cun la nova ovra d'accumulaziun a pumpa pon vegnir messas a disposiziun confurm als basegns radund 1500 uras da gigawatt (GWh) electricitad per onn. Ils stgalims existents da l'ovra electrica Cavaglia e Robbia sco er Campocologno vegnan manads vinavant er suenter l'engrondiment. L'ovra electrica existenta Palü vegn percunter messa ord funcziun. Las perditas da producziun che resultan pervia da l'augment da las quantitads d'aua da dotaziun resp. d'aua restanta pon vegnir cumpensadas per gronda part tras la pendenza pli gronda dal stgalim Lago Bianco – Camp Martin. La producziun actuala che resulta tras l'utilisaziun da la forza idraulica natirala (320 GWh) vegn pia a restar quasi la medema.
Resguardà en moda cumplessiva ils aspects ecologics
Il project da concessiun "Lagobianco" è vegnì elavurà da la Repower SA conscienziusamain durant blers onns. Ins ha tschernì ina metoda participativa. Il svilup dal project è vegnì accumpagnà stretgamain da las vischnancas concessiunaras, da las organisaziuns per la protecziun da l'ambient e dals posts spezialisads pertutgads da la confederaziun e dal chantun. Tras quai ha il project da concessiun obtegnì in standard fitg aut areguard ils aspects dal dretg da las auas e da l'ambient.
Là nua ch'i na pon betg vegnir evitadas intervenziuns en la natira, sto la Repower SA prender mesiras cumplessivas da protecziun, da restabiliment e da cumpensaziun. Quai vala en spezial per las mesiras da revitalisaziun che ston vegnir realisadas sco mesiras da cumpensaziun per lung dal Poschiavino. Per garantir la coordinaziun da questas mesiras cun ulteriuras mesiras da revitalisaziun e da la protecziun cunter aua gronda han il chantun, la vischnanca da Puschlav e la Repower SA sviluppà cuminaivlamain il "Concept per il svilup da las auas da la Val Puschlav" (CSA). Il project da concessiun prevesa la realisaziun da differentas mesiras or dal CSA.
Per las mesiras da revitalisaziun vegnan duvradas surfatschas da terren per lung dal Poschiavino. Ins ha chattà in vast consens, tenor il qual l'acquist da terren duai vegnir realisà tras il regruppament dal terren. Ensemen cun la vischnanca da Puschlav e cun l'associaziun agricula Puschlav (AAP) ha la Repower SA inoltrà ina dumonda correspundenta per far in regruppament dal terren. La regenza ha acceptà questa dumonda en il rom da l'approvaziun da la concessiun. Per realisar il regruppament dal terren vegn la vischnanca da Puschlav a far diever d'ina "metoda solidara". Tras quella duai vegnir garantì che las surfatschas da terren vegnian attribuidas en moda equilibrada als purs pertutgads e ch'ina cultivaziun agricula raschunaivla restia pussaivla er en l'avegnir en il Puschlav.
Impurtanza per la politica d'energia e per l'economia publica
L'engrondiment dals implants electrics en il Puschlav sa cunfa dal tuttafatg cun las finamiras da la confederaziun e dal chantun areguard la politica d'energia. Las novas modas da producir electricitad regenerabla (fotovoltaica, energia dal vent), da las qualas resulta ina producziun irregulara, vegnan utilisadas pli e pli savens. A medem temp vegni prendì en mira da sortir da la forza nucleara. Uschia crescha il basegn per energia regulara. Perquai èn dumandadas en spezial pussaivladads d'accumular l'energia, numnadamain implants che han la "funcziun da battaria". Grazia al project "Lagobianco" èsi pussaivel da furnir ina contribuziun essenziala a l'economia d'energia.
Cun il project "Lagobianco" po la Repower SA amplifitgar ses parc da producziun cun la tecnologia da l'accumulaziun a pumpa, quai che rinforza l'interpresa. Quai è er in avantatg per il chantun Grischun, damai che la Repower SA è da gronda impurtanza per l'economia d'energia, per la politica d'energia e per l'economia publica. Tant las vischnancas concessiunaras sco er il chantun profiteschan ultra da quai da prestaziuns finanzialas considerablas. Ina giada ch'ils implants engrondids èn mess en funcziun, resultan per la communitad taxas unicas da radund 12 milliuns francs ed entradas periodicas annualas da 6 fin 7 milliuns francs.
Proxim pass: projectaziun detagliada
Cun l'approvaziun da la concessiun e cun la concessiun d'ulteriuras permissiuns ha il project "Lagobianco" cuntanschì ina finamira intermediara impurtanta. Suenter l'approvaziun da la concessiun sto ussa vegnir realisada ina procedura per la projectaziun detagliada. La Repower SA sto pia oravant tut anc elavurar il project da construcziun per obtegnair l'approvaziun dal project e concluder il segund stgalim da l'examinaziun ecologica, avant ch'ella po decider davart il conclus da construcziun.
Infurmaziuns:
president da la regenza dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail
Mario.Cavigelli@bvfd.gr.ch
Gremi: regenza
Funtauna: rg chanzlia chantunala dal Grischun