Navigation

Inhaltsbereich

  • Erste Mitteilung
  • Neuen Beitrag einfügen
Dumengia, ils 18 da matg 2014, han lieu las elecziuns cirquitalas e las elecziuns da la regenza en il chantun Grischun. Ils resultats vegnan actualisads la dumengia d'elecziun mintga ura en l'internet sut www.gr.ch ed er communitgads sur twitter (#GR14).

Dumengia, ils 18 da matg 2014, a chaschun da las elecziuns cirquitalas vegnan las votantas ed ils votants dal Grischun ad occupar da nov ils suandants mandats:  
  • deputadas e deputads en il cussegl grond (parlament chantunal)
  • suppleantas e suppleants dal cussegl grond
En ils suandants 4 circuls han lieu supplementarmain elecziuns d'autoritads (presidenta cirquitala/president cirquital e suppleanta/suppleant): Tumleastga, Mesauc, Engiadin'ota e Surses. Quai èn ils circuls che han anc incumbensas communalas delegadas durant la realisaziun da la refurma dal territori dal Grischun e che servan sco purtaders da la collavuraziun intercommunala.

Las elecziuns dal cussegl grond valan per ina perioda d'uffizi da 4 onns (che cumenza il 1. di da la sessiun d'avust 2014). La repartiziun actuala dals 120 sezs en il cussegl grond sin ils 39 circuls – calculada tenor la populaziun residenta permanenta – pudais Vus consultar qua.

Dumengia, ils 18 da matg 2014, han lieu ensemen cun las elecziuns cirquitalas er las elecziuns da la regenza per la perioda d'uffizi dal 1. da schaner 2015 fin ils 31 da december 2018.

La chanzlia chantunala dal Grischun publitgescha sut www.gr.ch ils resultats intermediars da las elecziuns dumengia, ils 18 da matg 2014, a partir da las 12.00. Circuls, dals quals ils resultats da las elecziuns dal cussegl grond èn avant maun, survegnan en l'internet in document da PDF che cuntegna ils nums da las candidatas e dals candidats elegids. Ils resultats da las 146 vischnancas davart las elecziuns da la regenza èn cumpilads en in'unica datoteca da PDF. Ils resultats intermediars vegnan actualisads mintga ura fin che las elecziuns èn a fin. Sin twitter communitgescha il servetsch da medias dal Grischun (Mediendienst KtGR) ils resultats il di d'elecziun cun hashtag #GR14. (Ils resultats intermediars dals projects da votaziun federals han il hashtag #abst14.)
In eventual segund scrutini per las elecziuns cirquitalas e per las elecziuns da la regenza è previs per dumengia, ils 15 da zercladur 2014.

La chanzlia chantunala fa attent las votantas ed ils votants ch'i sto vegnir resguardà il suandant per emplenir il cedel electoral:

1. Cedels electorals n'èn betg valaivels, sche:
a) els n'èn betg uffizials;
b) els èn emplenids or auter che a maun;
c) els cuntegnan remartgas ingiuriusas u caracterisaziuns evidentas;
d) els cuntegnan "quel(s) u quella(s) fin ussa" u chaussas sumegliantas.

2. Sco vuschs nunvalaivlas da candidatas e da candidats vegnan stritgads:
a) ils nums da persunas che na pon betg vegnir elegidas u che na pon betg pli vegnir reelegidas;
b) las repetiziuns da nums da candidatas e da candidats ch'il medem cedel electoral cuntegna gia ina giada (cumulaziun);
c) ils nums ch'èn scrits en moda illegibla;
d) ils nums da persunas che n'èn betg designadas cleramain;
e) nums ch'èn da memia (da sut ensi). 
 
 
Infurmaziuns:
Walter Frizzoni, vicechancelier, tel. 081 257 22 22, e-mail Walter.Frizzoni@staka.gr.ch  


Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel