Cuntegn da la pagina

Situaziun finanziala solida tar las vischnancas grischunas

  • Erste Mitteilung
  • Neuen Beitrag einfügen
L'uffizi da vischnancas analisescha mintga onn ils quints annuals da tut las vischnancas grischunas. Questa statistica da las finanzas da las vischnancas mussa ch'il trend positiv en direcziun da finanzas solidas e saunas ha cuntinuà er l'onn 2012. Quest maletg legraivel sa mussa en la facultad disponibla en media per abitant, ch'è creschida envers l'onn precedent da 624 francs a 1033 francs. Sco positiv sto er vegnir giuditgà il svilup da la media dal pe da taglia. La gronda part da las vischnancas ha ina basa finanziala sauna.

Circa dapi la midada dal millenni po vegnir observà in svilup legraivlamain positiv da la situaziun finanziala da las vischnancas grischunas. Bain han ils resultats dals onns 2010 e 2011 turblà las perspectivas. L'onn da gestiun 2012 ha alura però briglià cun indicaturs generalmain positivs ch'èn stads per part schizunt sur la media da blers onns. Ina influenza essenziala sin questas valurs che vegnan calculadas mintgamai sco media per abitant, han gì in pèr cas spezials en paucas vischnancas. Perquai ston las medias da las valurs excellentas vegnir analisadas pli differenziadamain en il cas singul. Las differenzas finanzialas en il cas singul èn grondas ed èn anc daventadas pli grondas ils ultims onns, saja quai pervia da mancanzas da resursas u pervia da las grevezzas smesiradas. Talas differenzas pon mo vegnir reducidas en moda moderada cun agid d'ina gulivaziun da finanzas moderna ed efficazia.

Dapi l'onn 1994 datti ina retschertga statistica dals quints annuals da las vischnancas grischunas che vegn evaluada da l'uffizi da vischnancas. Sin basa dals indicaturs eruids pon las finanzas da las vischnancas vegnir cumparegliadas en general sco er ina cun l'autra. Medemamain èsi pussaivel da trair conclusiuns davart il svilup finanzial da mintga singula vischnanca sur in temp pli lung. La concentraziun d'infurmaziuns davart la situaziun finanziala è in instrument directiv prezius per las persunas responsablas en las vischnancas. Nua ch'i sa mussa per exempel in svilup negativ, pon vegnir instradadas a temp cuntramesiras grazia a questas infurmaziuns.

La media da la facultad netta per abitant è s'augmentada l'onn 2012 da 409 francs a 1033 francs. Circa in terz da l'augment deriva dals retgavs da las scadenzas da concessiuns en las vischnancas da Claustra-Serneus, Mustér e Sumvitg. Da las 69 vischnancas che avevan l'onn 2012 in debit net han 38 pudì sa meglierar envers l'onn precedent, 31 han percunter gì in debit net anc pli grond.

Er ils indicaturs quota dal servetsch da chapital e quota da la grevezza da tschains sco er il grad d'atgna finanziaziun èn sa meglierads envers l'onn precedent. Questa tendenza positiva s'exprima en il svilup da la media dals pes da taglia (media betg valitada tenor abitant). Questa media ha cuntanschì l'onn 2003 anc ina valur da passa 110 % ed ha pudì vegnir reducida successivamain dapi lura (2012: 104,2 %; 2014: 100,99 %). Las fusiuns da vischnancas che han er gì ina influenza sin la media dal pe da taglia na dastgan betg vegnir emblidadas en quest connex. Suenter var 10 onns experientscha cun fusiuns da vischnancas en il Grischun po per l'emprima giada vegnir fatga in'analisa concreta dal svilup dals pes da taglia suenter ina fusiun. Ils pes da taglia ch'èn vegnids fixads il mument da la fusiun sa preschentan sco stabils. En la perioda d'observaziun dals onns 2006 fin 2014 hai dà 21 fusiuns da vischnancas (cun totalmain 83 vischnancas pertutgadas) en il chantun Grischun. 19 vischnancas han pudì fixar il pe da taglia nov sut la media dals pes da taglia da las singulas vischnancas. Fin ussa ha mo ina vischnanca fusiunada (St. Antönien) augmentà ses pe da taglia. Duas vischnancas (Tumegl e Bregaglia) han pudì sbassar suenter la fusiun anc ina giada il pe da taglia ch'era gia vegnì fixà sut la media da las vischnancas fusiunadas.

Malgrà questa buna situaziun da partenza stoi vegnir resguardà che la situaziun finanziala po sa differenziar fermamain da vischnanca a vischnanca. Ultra da quai sto in giudicament cumplessiv da la situaziun finanziala d'ina singula vischnanca resguardar anc auters facturs. Latiers tutgan per exempel il stadi da l'infrastructura communala ed – en consequenza da quai – il basegn d'investiziun futur.

I sto anc vegnir renvià al fatg che l'introducziun successiva dal nov model da contabilitad MAC2 vegn ad avair consequenzas per ils indicaturs. Fin l'onn 2018 ston tut las vischnancas dal Grischun midar a quest standard. Ils proxims onns sto la statistica da las finanzas da las vischnancas vegnir fatga en moda parallela. La cumparegliabladad da vischnancas che lavuran cun MAC1 cun talas che lavuran cun MAC2 n'è betg dada, uschia ch'igl è necessari da far duas statisticas. MAC2 vegn ad augmentar la cumparegliabladad dals quints annuals da las vischnancas.

Il chantun sez ha fatg questa midada per l'onn da gestiun 2013 ed ha gia communitgà ils resultats (communicaziun a las medias dals 27 da mars 2014).
Ils documents da la statistica da las finanzas da las vischnancas stattan a disposiziun sin la pagina d'internet da l'uffizi da vischnancas sut www.afg.gr.ch /Actualitads. Ultra da quai è la Ginfo 1/2014 deditgada a quest tema. La publicaziun da l'uffizi da vischnancas cumpara avant Pasca 2014.


Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: Barbara.Janom@dfg.gr.ch  
- Thomas Kollegger, manader da l'uffizi da vischnancas, tel. 081 257 23 81, e-mail: Thomas.Kollegger@afg.gr.ch  


Gremi: departament da finanzas e vischnancas
Funtauna: rg departament da finanzas e vischnancas
Neuer Artikel