Navigation

Inhaltsbereich

  • Erste Mitteilung
  • Neuen Beitrag einfügen
Il departament d'educaziun, cultura e protecziun da l'ambient ha numnà signur Simon Berger sco nov tgirader da monuments dal chantun Grischun. Sco manader da la tgira da monuments vegn el a lavurar en l'uffizi da cultura a partir dal settember 2014. 

Simon Berger surpiglia questa incarica da Giovanni Menghini che ha manà la tgira da monuments stgars dus onns e che ha midà la primavaira 2014 ad in'autra incumbensa. Simon Berger ha 33 onns, è maridà ed ha in figl. A la facultad filosofic-istorica da l'universitad da Berna ha el studegià istorgia d'art e scienzas da medias cun spezialisaziun en tgira da monuments ed en management da monuments. Suenter differentas plazzas entaifer l'institut d'istorgia d'art è el stà a partir da l'onn 2010 inventarisatur tar la tgira da monuments dal chantun Lucerna e collavuratur en il project dal fond naziunal svizzer davart las oranscharias e las serras en Svizra. Dapi l'onn 2012 lavura Simon Berger per la fundaziun "Pro claustra Son Jon a Müstair" sco mainagestiun e sco maister da la corporaziun dals tagliacrappa. Entaifer la fundaziun è el responsabel per il management dals projects e per la coordinaziun da las restauraziuns da la claustra Son Jon a Müstair, patrimoni mundial da la UNESCO. Per garantir la cuntinuitad en la fundaziun èsi vegnì fixà ch'el surpiglia la direcziun da la tgira da monuments il settember 2014.

Fotografia agiuntada:
Simon Berger, nov tgirader chantunal da monuments 


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel