Navigation

Inhaltsbereich

  • Erste Mitteilung
  • Neuen Beitrag einfügen
La cumissiun predeliberanta dal cussegl grond deliberescha la revisiun parziala da la lescha davart la cassa da pensiun per mauns da la sessiun da zercladur 2014 dal cussegl grond.

La cumissiun ad hoc ha predeliberà – sut il presidi da deputà Ralf Kollegger (Malix), en preschientscha da la cussegliera guvernativa Barbara Janom Steiner sco scheffa dal departament da finanzas e vischnancas sco er da represchentants da l'administraziun – la missiva da la regenza tar la revisiun parziala da la lescha davart la cassa da pensiun dal Grischun. Il cussegl grond vegn a tractar quest project da revisiun en la sessiun da zercladur 2014.

L'augment permanent da l'aspectativa da vita chaschuna ina durada pli lunga da la retratga da la renta. Plinavant èn las cassas da pensiun confruntadas ils ultims onns cun in regress constant da la rendita da chapital. Questas circumstanzas han gì per consequenza che las cassas da pensiun han stuì adattar lur prestaziun da basa fixa a las relaziuns ch'èn sa midadas. La cumissiun administrativa da la cassa da pensiun dal Grischun è stada sfurzada da reducir ils onns passads las tariffas da conversiun da al cumenzament 7,2 pertschient a 6,55 pertschient. Ils dabuns dals tschains pli bass sco er la reducziun da las tariffas da conversiun han manà tut en tut ad ina reducziun da la renta da vegliadetgna da passa 10 pertschient. La reducziun da la renta è ida dal tuttafatg a quint da las persunas assicuradas. Per tschiffar si las novas perditas da prestaziuns propona la regenza mesiras accumpagnantas. La cumissiun predeliberanta ha tractà durant duas sesidas la proposta da la regenza. Er sch'igl era incontestà d'entrar en chaussa, èn las opiniuns divergiadas en la tractativa detagliada. Ina maioritad da la cumissiun beneventa la proposta da la regenza, tenor la quala il process da spargn per las prestaziuns da vegliadetgna duai cumenzar da nov a partir dal 20avel onn (oz: 25avel onn). Ultra da quai duain las contribuziuns da spargn vegnir augmentadas a partir dal 45avel onn per in punct procentual dal salari assicurà. Questa regulaziun va memia lunsch per ina minoritad da la cumissiun. Ella propona che la regulaziun vertenta duaja vegnir mantegnida. 
 

Infurmaziuns:
Ralf Kollegger, president da la cumissiun predeliberanta, tel. 079 611 08 60


Gremi: cumissiun predeliberanta per la revisiun parziala da la lescha davart la cassa da pensiun
Funtauna: cumissiun predeliberanta per la revisiun parziala da la lescha davart la cassa da pensiun
Neuer Artikel