Cuntegn da la pagina

La pratica cumprovada en il sectur d'asil vegn cuntinuada

  • Erste Mitteilung
  • Neuen Beitrag einfügen
Cun ina strategia per collocar ed assister persunas dal sectur d'asil sco er cun in concept da scola conferma la regenza la pratica ch'è sa cumprovada durant blers onns e che prevesa da dar alloschi a las requirentas ed als requirents d'asil en centers collectivs chantunals. En centers da transit spezials vegnan ils uffants ch'èn obligads dad ir a scola instruids tras persunas d'instrucziun e preparads cun cleras finamiras per lur midada en las structuras regularas. Uschia vegni garantì ch'els pon midar a la scola primara u secundara en cas d'ina decisiun positiva davart lur dretg da restar en Svizra. Ina finamira centrala da questa strategia resta quella da distgargiar las vischnancas. 

En il chantun Grischun vegnan persunas dal sectur d'asil collocadas er vinavant en alloschis collectivs. La regenza ha approvà ina strategia per collocar ed assister persunas dal sectur d'asil, la quala è vegnida elavurada sin basa da concepts existents. L'uffizi da migraziun e da dretg civil maina in center per l'emprima registraziun, tenor basegn plirs centers da transit, in center d'expulsiun ed in center minimal. Uschia poi vegnir tegnì quint optimalmain dals basegns da las requirentas e dals requirents d'asil e da las persunas admessas provisoricamain, ma er da las activitads d'assistenza e d'execuziun da l'uffizi. La collocaziun e l'assistenza en centers collectivs èn sa cumprovadas ils ultims onns ed èn bler pli favuraivlas cumpareglià cun la collocaziun individuala en abitaziuns. Las pauschalas globalas da la confederaziun han mintgamai cuvrì ils custs en il passà, uschia ch'il chantun n'ha duvrà nagins agens meds finanzials en quest sectur. Sche las requirentas ed ils requirents d'asil survegnan il dretg da restar provisoricamain u definitivamain en Svizra, pon els bandunar l'alloschi. Quai dentant sut la premissa ch'els sajan economicamain per gronda part independents e ch'els possian procurar per sasezs sco er per lur confamigliaras e confamigliars. 

La carriera da scola dals uffants na duai betg vegnir interrutta
Cumplementarmain a la strategia per collocar ed assister persunas dal sectur d'asil ha la regenza deliberà in concept per manar scolas en alloschis collectivs. Uffants ch'èn collocads en alloschis collectivs e ch'èn obligads dad ir a scola vegnan instruids er en l'avegnir en atgnas scolas. Pervia da la partenza da lur pajais resp. pervia da lur fugia resulta ina ruptura fitg radicala en il curs da la vita ed en la carriera da scola dals uffants che derivan savens d'in auter circul cultural e che han per regla stuì bandunar sfurzadamain lur patria. Il concept per manar scolas en alloschis collectivs prevesa ina instrucziun che resguarda las abilitads, ils talents e las fermezzas da mintga singula scolara e da mintga singul scolar, tras quai che las finamiras da l'instrucziun vegnan adattadas individualmain. Uschia tegna il chantun Grischun quint dal dretg da quests uffants da survegnir ina instrucziun particulara. Qua tras vegnan ils uffants preparads per pudair midar pli tard en la scolina, en il stgalim primar, en il stgalim secundar I u en ina scola professiunala che vegn frequentada en il rom d'in emprendissadi. Quai permetta da mantegnair la cuntinuitad da lur carriera da scola ch'è impurtanta en vista ad ina integraziun en Svizra u al return en il stadi d'origin u da derivanza. Ultra da la finamira primara da preparar ils uffants per ina midada en las structuras regularas vegnan las vischnancas distgargiadas da l'incumbensa da realisar l'emprima integraziun da las scolaras e dals scolars.

En cas ch'ina dimora dura pli ditg poi excepziunalmain esser inditgà d'examinar, sch'er scolaras e scolars ch'èn collocads en in alloschi collectiv duain midar en las structuras regularas. Sche las premissas èn avant maun tant areguard la scola sco er areguard la lingua, po la midada vegnir instradada en enclegientscha cun la vischnanca pertutgada respectivamain cun l'autoritad da scola cumpetenta. Per distgargiar ils purtaders da scola pertutgads surpiglia il chantun en tals cas ils custs da scolaziun sin basa da la lescha da scola. 
 

Infurmaziuns:
- cusseglier guvernativ dr. Christian Rathgeb, schef dal departament da giustia, segirezza e sanadad dal Grischun, tel. 081 257 25 01, christian.rathgeb@djsg.gr.ch  
- Marcel Suter, manader da l'uffizi da migraziun e da dretg civil dal Grischun, tel. 081 257 25 21, marcel.suter@afm.gr.ch  
 

Gremi: departament da giustia, segirezza e sanadad dal Grischun
Funtauna: rg departament da giustia, segirezza e sanadad dal Grischun
Neuer Artikel