Cuntegn da la pagina

Il register central da persunas duai star a disposiziun a partir da l'onn 2015

  • Erste Mitteilung
  • Neuen Beitrag einfügen
Il chantun prepara l'applicaziun da dus registers uffizials centrals. Gia l'onn 2015 duai il nov register chantunal da persunas pudair vegnir mess en funcziun. Plinavant vegn preparà in register chantunal d'objects. Per pudair duvrar quests registers electronics confurm a la protecziun da datas dovri ina midada da lescha.

L'onn 2010 ha il cussegl grond decidì ch'il chantun possia manar ina plattafurma da datas cun in register central da persunas sco er cun in register central d'objects (cun datas davart ils edifizis e davart las abitaziuns). Entant ch'il project per in register da persunas è gia fitg avanzà, stat il project d'in register central d'objects anc al cumenzament: l'emprim ston vegnir coordinadas per quest intent differentas collecziuns da datas da las vischnancas, dal chantun e da la confederaziun. Per dentant pudair duvrar en l'avegnir tuts dus registers ston vegnir creadas las basas giuridicas concernent la protecziun da datas. Per quest intent propona la regenza al cussegl grond ina revisiun parziala da la lescha davart ils registers d'abitantas e d'abitants che duai entrar en vigur il 1. da schaner 2015.

Il register central da persunas dal chantun survegn per sia lantschada a partir da l'onn 2015 las datas dals registers d'abitantas e d'abitants da las vischnancas. Tras la revisiun da la lescha vegn reglà l'access a las datas. I vegn garantì ch'ils posts cun dretg d'access (uffizis chantunals, tscherts instituts da dretg public, vischnancas) dastgan consultar mo quellas caracteristicas da las datas da persunas ch'els dovran per ademplir lur incumbensas publicas francadas en las leschas. Las autorisaziuns respectivas vegnan dadas da la regenza. Tut ils access da mintga utilisadra ed utilisader al register da persunas vegnan protocollads.

Cun il register central da persunas po la circulaziun da las infurmaziuns tranter l'administraziun chantunala e las vischnancas vegnir simplifitgada considerablamain, e l'administraziun po vegnir concepida meglier tenor ils basegns da las burgaisas e dals burgais. D'in register central da persunas profiteschan er l'administraziun da taglia, l'uffizi da migraziun e da dretg civil sco er l'uffizi per il traffic sin via. Quests trais uffizis chantunals èn vegnids integrads en il project en il rom d'ina fasa da pilot. Ma er las novas autoritads per la protecziun d'uffants e da creschids (APUC) en il chantun èn dependentas d'ina collecziun da datas centrala. Plinavant metta in register central da persunas a disposiziun ina infrastructura da basa per novs process dad e-government (p.ex. vote électronique).

Il cussegl grond vegn a tractar la fatschenta en la sessiun d'avust 2014. 
 

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01, e-mail Hansjoerg.Trachsel@dvs.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel