Navigaziun principala

Cuntegn da la pagina

Crap da fundament per il nov museum d'art dal Grischun

  • Erste Mitteilung
  • Neuen Beitrag einfügen
Il nov museum d'art dal Grischun a Cuira po vegnir construì: Suenter las lavurs da stgavament sin l'anteriur areal Sulser è vegnì mess oz il crap da fundament per l'edifizi nov. En 2 onns duai vegnir avert il nov museum.

Sin il plazzal dal nov museum d'art dal Grischun a la Grabenstrasse a Cuira han pudì vegnir concludids – suenter 4 mais – la fin da matg 2014 sin il termin il stgavament e l'armadira dal stgav. En tut èn vegnids manads davent 20 000 meters cubic terra, 438 armadiras èn vegnidas furadas e 382 champs betunads. Il fossal cun la grondezza da 32 sin 35 meters è stgavà fin ad ina profunditad da 18 meters.
En preschientscha da l'architect Alberto Veiga è vegnì mess oz sin il plazzal il crap da fundament per l'edifizi nov. In recipient da tola lutegià che cuntegna indicaziuns davart il project da construcziun, perditgas dal temp sco er gasettas quotidianas actualas è vegnì betunà en il fundament. La construcziun brutta da l'edifizi vegn ad esser a fin la fin da l'onn 2014. In onn pli tard duain esser terminadas tut las lavurs da construcziun. L'avertura dal nov museum d'art è previsa per il zercladur 2016.
Ina donaziun generusa da 20 milliuns francs ha permess l'onn 2011 da lantschar il project per engrondir il museum d'art dal Grischun a Cuira. Il cussegl grond ha approvà il zercladur 2012 in credit dad 8,5 milliuns francs per la summa restanta. Il project è vegnì eruì en ina concurrenza, sa cloma "Die Kunst der Fuge" e deriva dal biro d'architectura Barozzi Veiga da Barcelona. Il biro d'architectura Barozzi Veiga ha gia realisà plirs edifizis da cultura e gudagnà concurrenzas per museums d'art, sco tranter auter quella per il musée des beaux arts a Losanna.
L'engrondiment e l'edifizi nov prestigius duain rinforzar la posiziun dal museum d'art dal Grischun sco instituziun d'art la pli impurtanta dal Grischun. El duai dentant er esser in museum d'impurtanza naziunala, d'ina vart pervia da sia profilaziun cumprovada, da l'autra vart pervia d'exposiziuns temporaras attractivas. Sco chasa d'art promova el artistas ed artists giuvens prioritarmain dal Grischun e tgira in barat frequent cun auters museums svizzers e da l'exteriur, cun scolas e cun ulteriurs circuls interessads. A differentas gruppas da vegliadetgna vegni intermedià e rendì pli famigliar l'art a chaschun d'occurrenzas cun la pedagoga da museum che han lieu regularmain. 


Ulteriuras infurmaziuns ed agiuntas sut:
Flyer da l'edifizi nov dal museum d'art

-
Fossal
- 
Visualisaziun da l'edifizi nov dal museum d'art

www.hochbauamt.gr.ch e www.buendner-kunstmuseum.ch  


Infurmaziuns:
- president da la regenza dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-mail Mario.Cavigelli@bvfd.gr.ch  
- Markus Dünner, architect chantunal, uffizi da construcziun auta, tel. 081 257 36 31, e-mail Markus.Duenner@hba.gr.ch  


Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel