Ad ina conferenza da las regiuns alpinas oz a Trento han ins prendì enconuschientscha cun plaschair da las lavurs en curs davart ina strategia da la UE per il territori alpin. Il chantun Grischun sustegna las stentas per rinforzar cunzunt il svilup economic en il territori alpin dapi il cumenzament ennà.
Avant 2 onns ha lantschà la cuminanza da lavur da las regiuns alpinas (ARGE ALP) cun participaziun dal chantun Grischun l'idea da sviluppar sin plaun europeic ina strategia macroregiunala per il territori alpin. Il palpiri d'iniziativa ch'è vegnì deliberà ad ina conferenza da las regiuns alpinas l'onn 2012 a Ragaz Bogn ha la finala gì per consequenza ch'il cussegl europeic ha surdà a la cumissiun europeica il december 2013 l'incumbensa d'elavurar ina strategia da la UE per il territori alpin (EUSALP).
A Trento (Italia) èsi vegnì rapportà oz ad ina conferenza da las regiuns alpinas davart las lavurs en curs vi d'in plan d'acziun EUSALP. En ina resoluziun han accentuà las scheffas ed ils schefs preschents da las regenzas da las regiuns alpinas l'impurtanza da la cooperaziun colleghiala al project. Areguard il cuntegn stoppia il plan d'acziun en spezial esser orientà a la prosperitad economica, a la schliaziun da problems en ils secturs traffic ed energia sco er al tractament duraivel da las resursas natiralas. La finamira principala per il chantun Grischun è quella da promover la creschientscha economica e d'augmentar uschia l'attractivitad da las regiuns alpinas sco lieu d'economia, da lavur e da domicil. Per quest intent sto vegnir considerà in partenadi cun ils medems dretgs tranter las Alps centralas e las metropolas circumstantas. L'engaschament per las Alps sto adina er esser in engaschament per las Alps centralas – ils territoris da muntogna. La cussegliera guvernativa Barbara Janom Steiner ha defendì quest giavisch oz a Trento er en il num da la conferenza da las regenzas dals chantuns alpins (CRCA).
ARGE ALP: la lavur da project cuntinuescha
Avant la conferenza da las regiuns alpinas ha gì lieu a Trento la 45. sesida da las scheffas e dals schefs da las regenzas da la ARGE ALP. Er la lavur da project è vegnida discutada. Dapi l'onn 2012 datti in project, sut la direcziun dal Grischun, per analisar l'influenza da la schelira permanenta sin bovas e crudada da grippa. A l'exempel dal massiv da la Bregaglia duain vegnir sviluppadas propostas per stgaffir in sistem che serva a localisar ed a survegliar sin ina gronda surfatscha las instabilitads da la grippa en ils territoris cun schelira permanenta. Pervia da las grondas navaglias durant l'enviern passà han ins stuì spustar las mesiraziuns da radar previsas. Percunter han ins – a chaschun d'ina gronda crudada da grippa al Piz Kesch – pudì prender provas da glatsch da la schelira permanenta or da la grippa crudada. Questa schelira permanenta emprovan ins ussa da datar. Il segund project ch'è en curs sut la direcziun dal Grischun – ARGE ALP sport – ha pudì registrar l'onn passà in nov record da participaziun: 1900 sportistas e sportists èn sa participads a las occurrenzas da sport da la ARGE ALP.
A la sesida è er vegnì approvà in nov project cun il titel "Fundus agri-cultura alpina". La finamira dal project è quella da crear ina plattafurma d'infurmaziun en l'internet davart la savida e l'agricultura tradiziunala dals purs. Da quai fan part infurmaziuns davart las razzas d'animals da niz e da plantas da cultura indigenas, davart la cultivaziun da cuntradas cultivadas e davart las isanzas dals purs.
Premi da la ARGE ALP 2014: La contribuziun grischuna sin la 2. plazza
Gia gievgia saira è vegnì surdà a Trento il premi da la ARGE ALP 2014. Per commemorar il cumenzament da l'emprima guerra mundiala avant 100 onns aveva la ARGE ALP appellà giuvenils dal territori alpin da s'occupar en contribuziuns da text e da film dal tema "pasch". Davart la dumonda "Co pudain nus garantir la pasch?" èn vegnidas inoltradas lavurs da tut ils pajais, da tut las regiuns e da tut ils chantuns commembers da la ARGE ALP. Ina giuria internaziunala ha fatg la premiaziun. Per sia contribuziun "Brev a mes basat Karl Marbach" ha Serafin Reiber da Cuira cuntanschì la 2. plazza en la categoria da las lavurs en scrit. Serafin Reiber survegn in premi da 2500 euros.
Fotografias agiuntadas:
Fotografia da gruppa da la 45. conferenza da las scheffas e dals schefs da las regenzas da la ARGE ALP a Trento (da sanestra): Markus Reiterer (convenziun da las Alps), Ugo Parolo (Lumbardia), Beate Merk (Baviera), Arno Kompatscher (Tirol dal sid), Manuele Bertoli (Tessin), Ugo Rossi (Trento), Willi Haag (Son Gagl), Günther Platter (Tirol), Barbara Janom Steiner (Grischun), Wilfried Haslauer (Salzburg) e Günther Eberle (Vorarlberg).
La cussegliera guvernativa Barbara Janom Steiner gratulescha al victur Serafin Reiber a chaschun da la surdada dal premi da la ARGE ALP a Trento.
Infurmaziuns:
Cussegliera guvernativa Barbara Janom Steiner, scheffa dal departament da finanzas e vischnancas dal Grischun, e-mail
barbara.janom@dfg.gr.ch (ella telefona lura enavos)
Dumondas da las medias per telefon: Luzi Bürkli, incumbensà per l'infurmaziun dal chantun Grischun, tel. 079 938 93 33
Gremi: ARGE ALP / regenza dal chantun Grischun
Funtauna: rg chanzlia chantunala dal Grischun