Rimnar uschè blers pass sco pussaivel, almain 10 000 per di – e quai durant 1 mais. La fin da zercladur è ida a fin la campagna da 9 emnas da l'uffizi da sanadad dal Grischun. Facit: Cun stgars 1 milliarda pass ha la populaziun grischuna circumdà dapli che 14 giadas il mund e cumprovà ch'ella è campiunessa mundiala dal moviment.
Il Grischun na fa anc avant la fin dal campiunadi mundial da ballape betg mo 1, mabain precis 912 557 548 pass – e s'acquista uschia il titel mundial dal rimnar pass. En quest connex sa mussi che las dunnas han dapli tschaffen da sa mover ch'ils umens. Dus terzs da las persunas ch'èn sa participadas eran dunnas. La media da la vegliadetgna importava 37 onns. Dus terzs derivavan da la Val dal Rain grischuna, il rest da tut las autras regiuns dal Grischun.
Concurrenza emoziunala
Che la campagna ha duvrà la noziun "campiunadi mundial" è stada ina imitaziun communicativa intenziunada dal campiunadi mundial da ballape – ma betg dapli. Uschia han 2 850 persunas pudì rimnar pocals cun l'app "Es ti fit" ch'è vegnida sviluppada aposta per quest intent – tgi che ha fatg durant 4x5 dis en media 10 000 pass, pia 50 000 pass per emna e 200 000 pass suenter 1 mais, ha survegnì il pocal persunal da campiun mundial. 1 672 participantas e participants (persunas che han duvrà l'app sco er persunas che han inoltrà la charta da resposta) han ademplì questas premissas e pon ussa sa sentir individualmain er sco campiunessas mundialas e campiuns mundials. "Daventar campiunessa mundiala u campiun mundial" n'è pia betg stà ina pretensiun d'in record internaziunal, mabain in'occurrenza emoziunala dal Grischun cun sasez: empè da guardar mo passivamain il campiunadi mundial da ballape ha il Grischun realisà ses agen campiunadi mundial: quel da rimnar pass. Tar il rimnar pass è il Grischun er vegnì sustegnì da sia generaziun la pli giuvna: Las classas e las scolinas da "scola en moviment" han rimnà da lur vart en moda creativa uschè bler temp en moviment sco pussaivel.
19 000 dumbrapass
Dals 28 d'avrigl fin ils 29 da zercladur 2014 ha il Grischun rimnà uschè blers pass sco pussaivel. Gidà ha qua in dumbrapass che ha pudì vegnir cumprà per in pretsch simbolic da 5 francs en mintga filiala da la banca chantunala grischuna. Entaifer 2 emnas èn ils 19 000 dumbrapass stads vendids. Il dumbrapass è svelt daventà in simbol indispensabel per il moviment en il Grischun. Qua èn las aspectativas vegnidas surpassadas per bainquant. Il chantun Lucerna cun duas giadas uschè blers abitants ed abitantas aveva repartì a sia populaziun 30 000 dumbrapass durant duas campagnas.
L'app resta activa
Pass n'han ins betg mo pudì rimnar cun il dumbrapass: L'app gratuita "Es ti fit" ha convertì en pass ils moviments dal mintgadi sco las lavurs da tegnairchasa precis uschia sco l'activitad en in studio da fitness. Pervia da la gronda dumonda ha l'uffizi da sanadad decidì da laschar activa questa app. Ed ella daventa anc pli persunala: La finamira da la campagna vegn remplazzada tras ina finamira d'emna da 50 000 pass e la cumparegliaziun cun las amias ed ils amis è vinavant pussaivla. Il rimnar pocals vegn sistì fin a la proxima campagna e vegn remplazzà tras ina novitad surprendenta. Las adattaziuns vegnan fatgas cun agid da dus updates da l'app. L'emprim update vegn gia mess a disposiziun en in pèr dis.
Grischun en moviment
La populaziun vegn pli e pli veglia, ils custs da sanadad creschan. I dat dentant in potenzial da franar quests custs: Las ristgas per malsognas betg infectusas e transmissiblas (uschenumnadas NCD) pon vegnir reducidas considerablamain tras in cumportament saun. Latiers tutga in moviment regular. Per quest motiv s'engascha il chantun Grischun cun "grischun en moviment" – sia strategia da la promoziun da la sanadad. Sper la campagna "Il Grischun daventa campiun mundial!" s'engascha la partiziun "promoziun da la sanadad e prevenziun" da l'uffizi da sanadad er a favur da scolas che promovan il moviment, a favur da spazis per sa mover en las vischnancas sco er a favur da la promoziun da la sanadad per persunas pli attempadas. Partenarias dal project "Il Grischun daventa campiun mundial" èn stadas la banca chantunala grischuna sco er Promoziun Sanadad Svizra. Sco interpresas sa participeschan cun lur collavuraturas e lur collavuraturs l'ospital chantunal dal Grischun, la banca chantunala grischuna, Somedia sco er ils servetschs psichiatrics dal Grischun e la cassa da malsauns publica. Ulteriuras infurmaziuns sin
www.graubuenden-bewegt.ch.
Infurmaziuns:
- Denise Rudin, manadra da la partiziun "promoziun da la sanadad e prevenziun", uffizi da sanadad dal Grischun, tel. 081 257 64 02,
denise.rudin@san.gr.ch
Gremi: uffizi da sanadad dal Grischun
Funtauna: rg uffizi da sanadad dal Grischun