Zum Seiteninhalt

La planisaziun dals ospitals è chaussa dal chantun: La regenza ha inoltrà in recurs tar il tribunal federal

  • Erste Mitteilung
  • Neuen Beitrag einfügen
La regenza grischuna ha inoltrà in recurs tar il tribunal federal en la cuntraversa cun il chantun Turitg davart la glista dals ospitals. La regenza pretenda ch'ina disposiziun intermediara dal tribunal administrativ federal vegnia annullada, che legitimescha il chantun Turitg da contestar il punct "psichiatria" da la glista dals ospitals dal Grischun.

Il tribunal administrativ federal aveva legitimà il chantun Turitg il fanadur passà en ina disposiziun intermediara da far recurs cunter il punct "psichiatria" da la glista dals ospitals dal Grischun. Cun la glista dals ospitals dals 8 d'october 2013 aveva la regenza grischuna dà ina incarica da prestaziun per malsognas secundaras da stress (psichiatria acuta) a la clinica holistica Engiadina, Susch. Cun l'inscripziun da la clinica da burn-out da Susch sin la glista dals ospitals dal Grischun sa vesa il chantun Turitg cumpromess en plirs interess degns da vegnir protegids. Sco tals ha il chantun Turitg fatg valair ina planisaziun dal provediment che correspunda als basegns sco er aspects finanzials.

La regenza grischuna pretenda en in recurs inoltrà tar il tribunal federal che la decisiun dal tribunal administrativ federal vegnia annullada. La regenza motivescha sia pretensiun giuridica sco suonda: Tar la planisaziun dals ospitals sa tracti d'in act suveran dal chantun. I na va betg che chantuns s'intermettian activamain en la politica d'ospitals d'in auter chantun e prescrivian a quel, co che quel stoppia far sia planisaziun dals ospitals. Sch'i vegniss concedida als chantuns il dretg da far recurs cunter conclus davart las glistas d'ospitals d'auters chantuns, vegniss sutminada l'autonomia da planisaziun dal chantun en il sectur da la planisaziun dals ospitals. Ultra da quai vegniss uschia dà als chantuns in med per agir cunter instituziuns che han ina meglra qualitad e che attiran pazientas e pazients d'instituziuns or da l'agen chantun. Quest protecziunissem cuntrafa cleramain a las finamiras da la legislaziun federala.

In motiv per il chantun Turitg da crititgar la planisaziun dals ospitals dal chantun Grischun fiss eventualmain alura avant maun, sch'il chantun Grischun restrenschess cun sias mesiras da planisaziun la libertad da las pazientas e dals pazients turitgais da tscherner l'ospital u periclitass lur segirezza dal provediment. Quai n'ha il chantun Grischun dentant betg fatg. Il chantun Grischun ha realisà sia planisaziun dals ospitals tenor ils criteris da planisaziun prescrits dal cussegl federal e n'ha uschia periclità en nagin reguard ni la libertad da tscherner l'ospital ni la segirezza dal provediment da las pazientas e dals pazients turitgais. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel