Navigation

Inhaltsbereich

  • Erste Mitteilung
  • Neuen Beitrag einfügen
Il chantun Grischun ha extendì moderadamain sia purschida en las medias socialas. Sin Facebook infurmeschan dapi oz ulteriurs uffizis dal chantun en periodas regularas davart temas interessants. Er Twitter e Youtube vegnan duvrads vinavant uffizialmain.

Tar la commembra da la regenza Barbara Janom Steiner e tar ils dus commembers da la regenza Mario Cavigelli e Christian Rathgeb sco er tar emprims uffizis èn ussa vegnids vitiers anc auters posts da servetsch dal chantun. Uschia dovran da nov per exempel er l'uffizi da construcziun auta, l'uffizi da construcziun bassa, l'uffizi d'energia e da traffic sco er l'uffizi da militar e da protecziun civila la pagina uffiziala da Facebook dal chantun Grischun (Facebook/KantonGR). Ils museums chantunals vegnan a sa preschentar en il futur anc pli ferm sin questa pagina ed er il servetsch archeologic sco er la biblioteca chantunala dal Grischun s'annunzian regularmain sin tala. L'idea è quella da porscher in mix d'ideas attractiv, cun il qual l'interess per las activitads dal chantun po vegnir augmentà.
Tut ils uffizis e posts da servetsch inditgads sa preschentan en moda cuminaivla sin Facebook – cun in'excepziun: La polizia chantunala dal Grischun ha da nov in'atgna pagina da Facebook (Facebook/KapoGR). Uschia duai vegnir tegnì quint da las actualitads quotidianas e dal grond interess per la lavur da la polizia. Er la commembra ed ils commembers da la regenza han in'atgna pagina persunala sin Facebook. Separada resta er la communicaziun sin Twitter. La commembra ed ils commembers da la regenza sco er las persunas che mainan in uffizi "tschivlottan" sut lur agen num. Ina survista da tut ils accounts da las medias socialas dal Grischun è disponibla en l'internet sut www.gr.ch / Rumantsch / Medias / Social Media.

Gremi: regenza
Funtauna: rg chanzlia chantunala dal Grischun
Neuer Artikel