Navigaziun principala

Cuntegn da la pagina

Lev augment da la populaziun er l'onn 2013

  • Erste Mitteilung
  • Neuen Beitrag einfügen
Per la fin da l'onn 2013 aveva il chantun Grischun ina populaziun permanenta da 194 959 persunas, 1039 dapli che l'onn precedent. Tant la populaziun estra sco er il dumber da naschientschas èn creschids. Quests dus facturs han contribuì al lev augment da la populaziun. 

Svilup pauc dinamic en la cumparegliaziun naziunala
Cun in augment da la populaziun permanenta da 0,5 pertschient sin 194 959 abitantas ed abitants l'onn 2013 è la rata da creschientscha en il Grischun bain in zic pli auta che l'onn precedent. Ella resta però er quest onn cleramain sut la media svizra dad 1,3 pertschient. In augment procentualmain pli pitschen ch'il Grischun per l'onn 2013 han mo trais chantuns (AI, AR, UR), entant che oravant tut intgins chantuns da la Svizra franzosa (FR, VD, VS) han obtegnì er quest onn in grond dumber d'abitantas ed abitants supplementars. 

Ulteriur augment da la populaziun estra
La populaziun svizra è creschida en il Grischun minimalmain per 50 persunas sin il dumber da 160 440 persunas, entant ch'il dumber da la populaziun estra è s'augmentà per bunamain 1000 persunas (da nov 34 519 persunas). La quota da persunas estras vi dal total da la populaziun è ussa 17,7 pertschient.

Il dumber da las abitantas e dals abitants portugais è creschì per 6,4 pertschient – da nov correspunda quest dumber ad ina quota da 26,7 pertschient da tut la populaziun estra. Il dumber da burgaisas e burgais da la Germania percunter è sa reducì levamain per 0,6 pertschient, la quota è anc tar 22,3 pertschient. Sin posiziun trais èn sco ils onns precedents las abitantas ed ils abitants talians cun ina quota da 17,1 pertschient da la populaziun estra. Tut las ulteriuras circa 130 naziunalitads ch'èn represchentadas en il chantun èn gruppas bler pli pitschnas.

Las persunas che immigreschan èn principalmain persunas giuvnas ch'èn ablas da lavurar. En questas categorias da vegliadetgna èn pia er represchentadas cleramain dapli persunas estras. La populaziun svizra è percunter en media bler pli veglia. 
 
Structura da vegliadetgna da la populaziun permanenta dal Grischun per ils 31-12-2013 
-
 

En la maioritad da las regiuns crescha la populaziun
Nov regiuns dal Grischun han mussà l'onn 2013 in augment da la populaziun, il pli cler la Val Mesauc cun 2,0 pertschient. Per il pli mo pitschnas reducziuns en cumparegliaziun cun l'onn precedent hai dà mo en il Grischun central, en l'Engiadina bassa e l'Engiadin'ota sco er en las duas regiuns dal Grischun dal sid Bregaglia e Puschlav. 

Populaziun permanenta per ils 31-12-2013 tenor regiuns sco er midadas l'onn 2013 
-
 

En la citad da Cuira hai dà l'onn 2013 in augment da la populaziun da 0,8 pertschient. La chapitala dumbra pia da nov 34 350 abitantas ed abitants permanents. Da las 12 vischnancas dal Grischun cun passa 3000 abitantas ed abitants èn Panaduz e Domat creschidas procentualmain il pli ferm. Da l'autra vart dumbravan la fin da l'onn 2013 anc 21 vischnancas dal Grischun main che 100 e totalmain 80 vischnancas main che 500 abitantas ed abitants. Tras las numerusas fusiuns da vischnancas sa reducescha quest anteriuramain bel dumber da pitschnas vischnancas actualmain mintga onn. 
 
Puspè in zic dapli naschientschas e mortoris 
Cun 1764 novnaschids èn vegnidas dumbradas l'onn 2013 tantas naschientschas sco anc mai dapi 12 onns. Malgrà ch'il dumber da mortoris è creschì vinavant sin 1721, poi vegnir registrà in saldo da naschientschas positiv. Ils ultims onns è quai plitgunsch stà l'excepziun en il Grischun. Tar ils novnaschids è la quota da burgaisas e burgais esters dal rest 19,7 pertschient, tar ils mortoris 5,9 pertschient.

Plinavant èn vegnidas serradas l'onn passà 860 lètgs, 84 pli pauc che l'onn precedent. Ils 327 divorzis (onn precedent: 354) represchentan schizunt ina valur fitg bassa en la cumparegliaziun da plirs onns. 
 
Resultats detagliads da las statisticas da la populaziun da tut las vischnancas e da tut las regiuns stattan a disposiziun sin la pagina d'internet da l'uffizi per economia e turissem sut www.awt.gr.ch/statistik
 

Infurmaziuns:
Patrick Casanova, manader da la basa da l'economia publica, tel. 081 257 23 74, e-mail: patrick.casanova@awt.gr.ch  
 
 
Gremi: uffizi per economia e turissem dal Grischun
Funtauna: rg uffizi per economia e turissem dal Grischun
Neuer Artikel