Zum Seiteninhalt

La collavuraziun POLYCOM tranter la confederaziun ed il chantun è garantida

  • Erste Mitteilung
  • Neuen Beitrag einfügen
Il chantun Grischun e la confederaziun han reglà en in contract l'utilisaziun cuminaivla da la rait da func da segirezza POLYCOM. Il cusseglier guvernativ Christian Rathgeb ed il directur general da duana Rudolf Dietrich han mess oz a Haldenstein lur suttascripziun sut ina cunvegna che regla il manaschi ed il mantegniment da la rait da func POLYCOM Grischun.

Il settember 2012 ha il chantun prendì en funcziun la rait da func da segirezza POLYCOM Grischun. Cun questa rait da func unitara en l'entira Svizra pon communitgar tut las organisaziuns da segirezza e d'emprim agid sco la polizia, il corp da guardias da cunfin, l'armada, ils pumpiers, la protecziun civila ed ils servetschs da salvament, e quai senza che lur discurs possian vegnir tadlads giu. La rait da func da segirezza duai vegnir manada e mantegnida d'in center da cumpetenza che suttastat a la responsabladad cuminaivla dal chantun e dal corp da guardias da cunfin. En ina cunvegna ch'è vegnida concludida oz a Haldenstein tranter il chantun Grischun e la confederaziun svizra è vegnida reglada en in contract la cooperaziun concernent POLYCOM.

En la cunvegna vegnan descrits ils dretgs ed ils duairs che la polizia chantunala ed il corp da guardias da cunfin han per garantir in manaschi da 24 uras da la rait da func. Ultra da quai survegnan la polizia chantunala ed il corp da guardias da cunfin il dretg vicendaivel da pudair duvrar la tecnica da func e l'infrastructura d'ina plazza d'antenna ch'è en proprietad e responsabladad da l'autra partida. Plinavant vegni fixà tge partida ch'è responsabla per mantegnair las infrastructuras respectivas. I vegn er francà il princip che las lavurs da mantegniment ston vegnir planisadas cuminaivlamain e realisadas en moda coordinada.

Ulteriuras infurmaziuns chattais Vus sut www.polycom.admin.ch e www.polycom.gr.ch
 

Fotografia agiuntada:
-
Il cusseglier guvernativ Christian Rathgeb ed il directur general da duana Rudolf Dietrich suttascrivan en il chastè da Haldenstein la cunvegna da POLYCOM. 
 

Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail christian.rathgeb@djsg.gr.ch  
 

Gremi: regenza
Funtauna: rg chanzlia chantunala dal Grischun
Neuer Artikel