La cumissiun deliberescha la realisaziun da la "iniziativa da charvun"

La cumissiun per ambient, traffic ed energia ha predeliberà e sustegna la missiva da la regenza tar la realisaziun da l'iniziativa chantunala dal pievel "Gea ad electricitad netta senza forza electrica da charvun" (revisiun parziala da la constituziun chantunala). 

Sut la direcziun dal president da la cumissiun Andreas Felix ed en preschientscha dal president da la regenza Mario Cavigelli sco er d'ulteriuras represchentantas e represchentants da l'administraziun chantunala ha la cumissiun dal cussegl grond per ambient, traffic ed energia predeliberà la missiva da la regenza tar la realisaziun da l'iniziativa dal pievel "Gea ad electricitad netta senza forza electrica da charvun". La cumissiun propona al cussegl grond da reveder la constituziun chantunala confurm a la missiva da la regenza e da recumandar al pievel d'acceptar quest project.
Ils 22 da settember 2013 han las votantas ed ils votants dal Grischun acceptà l'iniziativa chantunala dal pievel "Gea ad electricitad netta senza forza electrica da charvun", la quala era concepida en furma d'ina proposta generala. L'iniziativa pretenda d'integrar en la constituziun chantunala in confess cunter ovras electricas a charvun sco er in scumond per interpresas, a las qualas il chantun è participà, da far investiziuns en ovras electricas a charvun. Cun la missiva preschenta la regenza al cussegl grond ina regulaziun che concretisescha la pretensiun da l'iniziativa. Cun la disposiziun constituziunala proponida vegni – tenor l'avis da la cumissiun – garantì ch'il chantun n'acquistia naginas novas participaziuns a societads cun ovras electricas a charvun. Ultra da quai vegn il chantun obligà da s'engaschar en cas da basegn – en il rom da sias pussaivladads giuridicas e politicas – ch'i na vegnan fatgas naginas investiziuns en ovras electricas a charvun. Tenor l'avis unanim da la cumissiun correspunda la proposta da la regenza a las ideas ch'èn vegnidas exprimidas en l'iniziativa, ed a medem temp vegni francà uschia en la constituziun chantunala in cler confess cunter ovras electricas a charvun. La revisiun parziala da la constituziun chantunala è suttamessa al referendum obligatoric. Il cussegl grond vegn a tractar il project da la regenza en la sessiun da december 2014. 
 

Infurmaziuns:
president da la cumissiun Andreas Felix, tel. 079 445 50 71


Gremi: cumissiun per ambient, traffic ed energia
Funtauna: rg cumissiun per ambient, traffic ed energia