Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha approvà ina reducziun da las tariffas da l'assicuranza d'edifizis dal Grischun (GVG). Tut en tut desista la GVG da premias da totalmain 8 milliuns francs per onn. Plinavant ha la regenza garantì emprests e contribuziuns chantunalas. 

Premias pli bassas e damain supplements tar l'assicuranza d'edifizis
Il sistem tariffar da l'assicuranza d'edifizis dal Grischun (GVG) vegn simplifitgà e modernisà. Per il 1. da schaner 2015 ha la regenza concludì ina revisiun parziala correspundenta da l'ordinaziun tar la lescha davart l'assicuranza d'edifizis. Dal nov sistem da premias modern profitan las mastergnantas ed ils mastergnants sco er las proprietarias ed ils proprietaris d'edifizis. Tut en tut vegnan ellas ed els distgargiads annualmain per 8 milliuns francs.
Il sistem tariffar actual da la GVG è creschì istoricamain e na correspunda betg pli a las pretensiuns dad oz envers in sistem da premias d'assicuranza effizient ed effectiv. Cun sias passa 100 variantas da tariffas pussaivlas è il sistem memia differenzià. Ultra da quai na reflectescha el betg pli la situaziun da ristga actuala. Oz po per exempel vegnir desistì dals supplements da premias tar la protecziun cunter incendis, e quai pervia da cundiziuns da construcziun rigurusas. I duai er vegnir incassada mo pli ina premia supplementara sin ristga da donns elementars - empè da sco fin ussa trais.
Cun eliminar il supplement per ristga da fieu profitan a partir da l'onn 2015 ils manaschis da mastergn ch'èn activs en il Grischun d'ina reducziun da las premias d'annualmain 7 milliuns francs. Ultra da quai survegnan tut las proprietarias ed ils proprietaris d'edifizis ina reducziun da lur premia da basa da 2 fin 20 pertschient. Quai correspunda a premias pli bassas da supplementarmain 1 milliun francs per onn. Las entradas pli pitschnas da totalmain 8 milliuns francs per onn po la GVG supportar. Il svilup finanzial dals ultims 30 onns e l'absenza da grondas catastrofas han permess a la GVG da far reservas voluminusas. Il fond da reservas da la GVG importava la fin da l'onn 2013 var 392 milliuns francs.
A la GVG è affiliada la cassa per donns elementars dal Grischun (CDE). Cun ina revisiun parziala da l'ordinaziun tar la lescha davart l'indemnisaziun da donns elementars betg assicurabels ha la regenza adattà las cumpetenzas. Ils posts per annunziar donns e per far stimaziuns èn stads enfin ussa ils uffizi cirquitals en il chantun. Da nov fa la CDE sezza las stimaziuns dals donns ch'èn resultads pervia d'eveniments da la natira spezials. La CDE prenda er directamain encunter las annunzias dals donns. 

Cussegliaziun supplementara da las vischnancas en il nov dretg da la planisaziun dal territori
L'associaziun grischuna per il svilup dal territori (AGS) sustegna per incumbensa dal chantun las vischnancas a realisar la lescha federala davart la planisaziun dal territori revedida. Per realisar ina concept correspundent ha la regenza deliberà per mauns da la AGS in credit en la summa da totalmain 390 000 francs. Resalvada resta la concessiun dals credits necessaris tras il cussegl grond.
La lescha federala davart la planisaziun dal territori revedida ha tranter auter la finamira da limitar la creschientscha dals abitadis vers anora e da drizzar il svilup dals abitadis vers anen. La realisaziun da la nova lescha davart la planisaziun dal territori pretenda grondas stentas da vart da las vischnancas en ils secturs da la procuraziun da la basa, dal svilup da las metodas e da l'organisaziun dals process. Per impunder effizientamain ils meds finanzials, per realisar la planisaziun en moda coordinada sco er per sviluppar coerentamain la pratica vul il chantun procurar che las vischnancas vegnian infurmadas e cussegliadas cun cleras finamiras. L'associaziun grischuna per il svilup dal territori ha elavurà – sin intimaziun da l'uffizi chantunal per il svilup dal territori – in program da realisaziun modular per quest intent. 
 
 
Contribuziuns chantunalas a differentas instituziuns 
  • The Alpina Estate SA: A la "The Alpina Estate SA" vegn concedì in emprest da la confederaziun dad 860 000 francs en il rom da la nova politica regiunala (NPR) per construir in stabiliment da wellness ch'è accessibel al public e ch'è previs en l'interpresa d'alloschament "The Alpina Mountain Resort & Spa, Tschiertschen". Quai cun la resalva che la finanziaziun totala saja reglada. Sco prestaziun d'equivalenza a l'emprest da la NPR vegn garantida ina contribuziun chantunala da 144 772 francs. La construcziun dal stabiliment da wellness (sauna, biosauna, bogn da vapur, duschas d'aventura, sectur da quietezza) è ina part da la transfurmaziun previsa da l'hotel Alpina ch'è vegnì construì l'onn 1897 a la "The Alpina Mountain Resort & Spa".
  • Sutgeras e runals da Zuoz SA: A la Sutgeras e runals da Zuoz SA vegn concedì in emprest da la confederaziun dad 1,2 milliuns francs en il rom da la nova politica regiunala (NPR) per construir da nov la sutgera Albanas. Quai cun la resalva che la finanziaziun totala saja reglada. Sco prestaziun d'equivalenza a l'emprest da la NPR vegn garantida ina contribuziun chantunala da 202 007 francs. Il project remplazza in runal che datescha da l'onn 1953. Cun construir da nov la sutgera duain vegnir reducids ils custs da mantegniment, duai vegnir meglierà il confort e duai vegnir reducì il temp da viadi.
  • Teater acéphale: Al teater acéphale vegn concedida ina contribuziun da maximalmain 80 000 francs per la coproducziun svizra-cubana "Lazarus – occupy". La contribuziun chantunala vegn concedida cun la cundiziun che tant la Pro Helvetia sco er la citad da Cuira sa participeschian al project e che las preschentaziuns ch'èn previsas en il Grischun hajan propi er lieu. La premiera è planisada a La Havanna, Cuba, ils 15 da matg 2015, la premiera en Svizra è previsa a Cuira, ils 25 da zercladur 2015. 

Gremi: regenza
Funtauna: rg chanzlia chantunala dal Grischun
Neuer Artikel