Cuntegn da la pagina

Communicaziun da la regenza dals 11 da december 2014

  • Erste Mitteilung
  • Neuen Beitrag einfügen
La regenza grischuna ha deliberà las contribuziuns da la gulivaziun da finanzas 2014 per il pajament. Plinavant ha la regenza anticipà il termin d'annunzia per las elecziuns dal cussegl naziunal 2015. Ultra da quai èn vegnids concedids daners per cuntinuar cun l'offensiva da la marca turistica "Enavant Grischun". 

La regenza approvescha las contribuziuns da la gulivaziun da finanzas 2014
Per contribuziuns da gulivaziun a favur da vischnancas finanzialmain deblas sco er per promover fusiuns da vischnancas vegnan pajads l'onn 2014 circa 50,7 milliuns francs (onn precedent: 51,2 milliuns francs). La summa sa cumpona sco suonda:
- Per la gulivaziun da la forza fiscala 2014 vegnan pajads totalmain 16,2 milliuns francs a 42 vischnancas.
- Per contribuziuns ad ovras publicas vegnan pajads 6,3 milliuns francs.
- Sco "gulivaziun dal basegn spezial" vegnan pajads tut en tut 2 milliuns francs a 6 vischnancas.
- Per contribuziuns da promoziun a fusiuns da vischnancas vegnan pajads totalmain circa 26,2 milliuns francs.
Las contribuziuns da la gulivaziun da finanzas vegnan distribuidas l'onn 2015 l'ultima giada tenor il sistem vegl. La refurma da la gulivaziun da finanzas (refurma da la GF), ch'il pievel grischun ha approvà ils 28 da settember 2014, remplazza a partir dal 1. da schaner 2016 la veglia legislaziun davart la gulivaziun da finanzas. La fin da la stad 2015 vegn la regenza ad infurmar davart ils pajaments da gulivaziun ch'èn decisivs per l'onn 2016. 

Anticipà il termin d'annunzia per las elecziuns dal cussegl naziunal 2015
En vista a las elecziuns dal cussegl naziunal 2015 ha la regenza adattà dus termins. Il termin final per inoltrar glistas electoralas e l'ultim termin per rectifitgar las glistas e per declerar colliaziuns da glistas èn da nov pli baud cumpareglià cun las elecziuns 2011. Il termin final per s'annunziar per las elecziuns dal cussegl naziunal dals 18 d'october 2015 è da nov ils 3 d'avust 2015 (da nov 76 empè da 48 dis avant il di d'elecziun). La pussaivladad da rectifitgar las glistas e da declerar colliaziuns da glistas finescha ils 10 d'avust 2015 (da nov 69 empè da 41 dis avant il di d'elecziun). L'ordinaziun da la regenza davart las elecziuns dal cussegl naziunal vegn adattada correspundentamain.
Dapi l'onn 2011 vegnan ils numers da las glistas surdads tenor la successiun da las glistas electoralas inoltradas. Sche pliras propostas vegnan inoltradas il medem di, decida la sort. Sin fundament da las experientschas da l'onn 2011 pon ins quintar er l'onn 2015 che la gronda part da las glistas electoralas vegnia inoltrada l'emprim di pussaivel (18 da matg 2015) e ch'ins stoppia pia trair la sort. Quai permetta d'anticipar il termin d'annunzia per las elecziuns, uschia ch'il material electoral po vegnir tramess a las vischnancas pli baud (da nov 6 emnas avant il di d'elecziun). Las persunas cun dretg da votar survegnan il material electoral – sco tar las votaziuns – il pli baud 4 ed il pli tard 3 emnas avant il di d'elecziun. Il cedel electoral per las elecziuns dal cussegl dals chantuns vegn consegnà entaifer ils medems termins. 

Cuntinuaziun da l'offensiva da la marca turistica
L'offensiva da la marca turistica "Enavant Grischun", che vegn manada da Grischun vacanzas e che cumpiglia la campagna dals capricorns, vegn cuntinuada. Per ils onns 2015 fin 2018 ha la regenza garantì a l'uniun Grischun vacanzas ina contribuziun chantunala dad 1 milliun francs per onn (tut en tut 4 milliuns francs) per cuntinuar cun la realisaziun da l'offensiva da la marca turistica. Resalvada resta la concessiun dals credits necessaris tras il cussegl grond. Supplementarmain duain vegnir contribuids var 3,2 milliuns francs tras partenadis cun organisaziuns turisticas e nunturisticas.
La finamira è quella d'augmentar vinavant il grad d'enconuschientscha da la marca "graubünden" e da furnir ina contribuziun per auzar la dumonda per purschidas, servetschs e products dal chantun. Als partenaris duai er vegnir purschida ina plattafurma attractiva per la commerzialisaziun directa. Plinavant duai l'idea da la marca dal Grischun sco "metropola natirala" vegnir rendida enconuschenta a la vasta publicitad. Temas che vegnan communitgads en quest connex èn "qualitad da viver", "equiliber, inspiraziun", "diversitad, cultura" sco er "excellenza, productivitad". L'aspect da la durabilitad è d'ina impurtanza centrala en quest connex. 

Nov center per l'emprima registraziun da requirentas e requirents d'asil, Churwalden: Surdà l'incumbensa da prestaziun generala
Il team da prestaziun generala "Implenia" dad Implenia Svizra SA, Cuira, e da Liesch Ott architects, Cuira, ha survegnì l'incumbensa da planisar e da realisar il center per l'emprima registraziun da requirentas e requirents d'asil al Meiersboden, Churwalden. Suenter avair prendì invista dal rapport da la giuria e sin sia recumandaziun ha la regenza surdà l'incumbensa da prestaziun generala al team "Implenia", Cuira, per ses project "sin via". Il center per l'emprima registraziun è previs per circa 180 requirentas e requirents d'asil e cumpiglia sper il sectur d'alloschi er localitads d'administraziun e da scolaziun. Il nov edifizi efficazi or d'elements da lain correspunda a las pretensiuns ecologicas ed energeticas actualas. Suenter la surdada vegn fatg in project preliminar, alura vegn elavurada ina missiva per mauns dal cussegl grond per conceder in credit d'impegn.
Il rapport da la giuria po vegnir consultà sut www.hochbauamt.gr.ch
 

Da vischnancas e da regiuns 
  • Laax: Al project da la vischnanca da Laax per construir ina punt per peduns e per velos sur la via sursilvana ordaifer il vitg da Laax en il territori da Staderas vegn garantida ina contribuziun maximala da 367 632 francs. La punt augmenta la segirezza dals ciclists e dals peduns e meglierescha las relaziuns da traffic sin quest traject da la via chantunala.
  • Masagn: La revisiun parziala da la lescha da taglia da la vischnanca da Masagn dals 19 da zercladur 2014 vegn approvada. Cun la revisiun vegn stgaffida la pussaivladad d'incassar ina taxa da giasts ed ina taxa per promover il turissem.
  • Giuvaulta: La revisiun parziala da la lescha da taglia da la vischnanca da Giuvaulta dals 20 da november 2014 vegn approvada. Tras la revisiun è la taglia sin immobiglias vegnida auzada dad 1 ‰ ad 1,5 ‰.
  • San Murezzan: La revisiun parziala da la planisaziun locala da la vischnanca da San Murezzan, concludida ils 28 da settember 2014, vegn approvada. Tras la revisiun parziala vegn ina surfatscha da circa 1 hectara midada da la zona externa dal vitg a la zona per hotels "Hotel Laudinella". Uschia po l'hotel vegnir manà e sviluppà vinavant confurm a la zona.
  • Tujetsch: La lescha davart las taxas da giasts e da turissem da la vischnanca da Tujetsch dals 14 da november 2014 vegn approvada. La lescha communala da turissem permetta ina interpretaziun che correspunda al dretg surordinà.

Gremi: regenza
Funtauna: rg chanzlia chantunala dal Grischun
Neuer Artikel