Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha elegì dr. Christoph Caviezel e Thomas Huber sco novs cussegliers da banca da la banca chantunala grischuna. Els èn ils successurs da Jon Peider Lemm e da Not Carl ed entran en uffizi il 1. d'avrigl 2015. Ils temps d'uffizi dal vicepresident da banca Peter Wettstein e dal cusseglier da banca Franco Quinter èn vegnids prolungads mintgamai per in onn.

Tenor la lescha davart la banca chantunala grischuna (BCG) è la regenza cumpetenta per eleger il cussegl da banca che sa cumpona da set persunas. Ils 31 da mars 2015 fineschan las periodas d'uffizi dal vicepresident da banca Peter Wettstein (en il cussegl da banca dapi l'onn 2003 e vicepresident dapi l'onn 2009) e dals cussegliers da banca Franco Quinter (en il cussegl da banca dapi l'onn 2003), Not Carl (en il cussegl da banca dapi l'onn 1998) e Jon Peider Lemm (en il cussegl da banca dapi l'onn 1994). Tut ils quatter cussegliers da banca han cuntanschì la limitaziun dal temp d'uffizi da dudesch onns ch'è prescritta da la regenza. Per ch'i na stoppia betg vegnir renovada en ina giada passa la mesadad dal cussegl da banca e per ch'i dettia ina graduaziun adequata da las periodas d'uffizi, ha la regenza prolungà il temp d'uffizi dal vicepresident Peter Wettstein e dal cusseglier da banca Franco Quinter mintgamai per in onn. Ils cussegliers da banca Jon Peider Lemm e Not Carl vegnan substituids tras dr. Christoph Caviezel da Horgen (Turitg) e tras Thomas Huber da Möriken (Argovia). Els èn vegnids elegids da la regenza per la perioda d'uffizi dal 1. d'avrigl 2015 fin ils 31 da mars 2019. Cun questa elecziun da dus novs cussegliers da banca vegn fatg in ulteriur pass impurtant per renovar il cussegl da banca.

Dr. Christoph Caviezel ha 57 onns ed è burgais da Laax. El è creschì si a Razén ed a Cuira ed ha frequentà la scola chantunala a Cuira. A l'universitad da Friburg ha el fatg il licenziat da giurisprudenza e l'onn 1983 la patenta d'advocat dal Grischun. L'elecziun da dr. Christoph Caviezel è vegnida fatga sin fundament da sia experientscha da blers onns e cumprovada sco interprendider e sco spezialist d'immobiglias. Dapi l'onn 2008 è el mainagestiun da la gruppa Mobimo. La Mobimo Holding SA è quotada a la bursa svizra SIX Swiss Exchange e fa part – cun in portfolio d'immobiglias d'ina valur totala da passa 2,5 milliardas francs – da las societads d'immobiglias principalas da la Svizra.

Thomas Huber ha 51 onns. El è maridà ed abita cun ses trais uffants a Möriken. El ha studegià economia da manaschi ed ha obtegnì il diplom sco revisur da quints e sco International Fund Officer FA. El è expert da revisiun admess ed ha lavurà durant 23 onns per la PricewaterhouseCoopers (PwC). L'elecziun da Thomas Huber è vegnida fatga sin fundament da sia experientscha da blers onns e cumprovada sco revisur da quints e sco controllader da bancas. Dapi l'onn 2012 è el interprendider independent e possessur da la inno.thinc holding SA. La inno.thinc holding SA vegn gist constituida ed ha tranter auter la finamira da meglierar il manaschament electronic da datas en las interpresas pitschnas e mesaunas (IPM).

La renovaziun dal cussegl da banca ch'è adina puspè necessaria, vegn fatga resguardond las prescripziuns da l'autoritad federala per la surveglianza dals martgads da finanzas FINMA ed il profil d'exigenzas da la regenza per il cussegl da banca. Las pretensiuns envers il cussegl da banca sco tal, envers ses singuls commembers ed envers il president da banca èn vegnidas repassadas l'avrigl 2013 tras la regenza ed adattadas a las prescripziuns dal dretg da surveglianza. 
 

Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas dal Grischun, tel. 081 257 32 01 


Gremi: regenza
Funtauna: rg chanzlia chantunala dal Grischun
Neuer Artikel