L'emna proxima vegn lantschà il nov project per las interpresas pitschnas e mesaunas (IPM) "Structuras favuraivlas per famiglias sco factur da success" en las regiuns Grischun central, Surselva e Viamala. L'occurrenza d'avertura ha lieu glindesdi, ils 19 da schaner a Glion. Il schef dal departament d'economia publica e fatgs socials, cusseglier guvernativ Jon Domenic Parolini, tegna il pled d'avertura.

Las interpresas pitschnas e mesaunas en las regiuns Viamala, Surselva e Grischun central survegnan l'occasiun d'analisar lur cundiziuns da lavur areguard las structuras favuraivlas per famiglias e d'elavurar mesiras sin mesira per meglierar la cumpatibilitad da la famiglia e da la professiun. Il project "Structuras favuraivlas per famiglias sco factur da success" dura 3 onns e vegn organisà dal post da stab per l'egualitad da las schanzas ensemen cun il center UND sco er ensemen cun ils posts da svilup regiunal Grischun central, Surselva e Viamala. 

Profitar d'experientschas
Da l'onn 2011 fin l'onn 2013 è il project gia vegnì realisà sco emprova da pilot en la Val dal Rain grischuna. Nov IPM han elavurà e realisà passa 20 mesiras per obtegnair structuras favuraivlas per famiglias. Da quai pon profitar anc oz circa 700 collavuraturas e collavuraturs. La finamira è quella da laschar prender part da las experientschas da questas interpresas da la Val dal Rain grischuna er las IPM da las regiuns Viamala, Surselva e Grischun central.
Ina buna cumpatibilitad da la professiun e da la famiglia è oz in factur decisiv per il success economic d'in manaschi. L'interpresa profita da collavuraturas e collavuraturs motivads e loials, d'in bun clima da lavur, da main absenzas e d'ina buna reputaziun. 

Ulteriuras infurmaziuns: Post da stab per l'egualitad da las schanzas
 

Las occurrenzas d'avertura èn publicas e vegnan organisadas en ils suandants lieus:
glindesdi, ils 19 da schaner 2015, a las 18.30, Cinema Sil Plaz, Via Centrala 2, Glion
gievgia, ils 22 da schaner 2015, a las 18.30, Kino Rätia, Obere Stallstrasse 14, Tusaun 
  

Infurmaziuns:
Susanna Mazzetta, manadra dal project, post da stab per l'egualitad da las schanzas, tel. 081 257 35 72 / 079 483 74 01, e-mail: Susanna.Mazzetta@stagl.gr.ch
 

Gremi: post da stab per l'egualitad da las schanzas
Funtauna: rg post da stab per l'egualitad da las schanzas