La cumissiun per giustia e segirezza ha predeliberà duas missivas da la regenza. D'ina vart è quai il concordat davart las prestaziuns da segirezza privatas, da l'autra vart il concordat midà davart las mesiras cunter la violenza a chaschun d'occurrenzas da sport.

Sut la direcziun dal president da la cumissiun Alessandro Della Vedova ed en preschientscha dal cusseglier guvernativ Christian Rathgeb ha la cumissiun per giustia e segirezza predeliberà las missivas concernent ils dus concordats per mauns dal cussegl grond. La cumissiun propona al cussegl grond la participaziun dal chantun Grischun al concordat davart las prestaziuns da segirezza privatas sco er l'approvaziun da las midadas dal concordat davart las mesiras cunter la violenza a chaschun d'occurrenzas da sport. 

Concordat davart las prestaziuns da segirezza privatas
La cumissiun sustegna l'opiniun da la regenza, tenor la quala interpresas da segirezza privatas adempleschan adina dapli lavurs en il sectur da segirezza. Tar quellas tutgan tranter auter la surveglianza e la protecziun da persunas e da rauba, il servetsch d'urden a chaschun d'occurrenzas e d'eveniments gronds, la gestiun d'indrizs d'alarm, transports da segirezza ed incumbensas da detectiv. Questas activitads da l'economia privata sa cruschan per part cun la lavur da la polizia ed èn regladas differentamain ubain n'èn betg regladas en il chantun Grischun sco er en divers auters chantuns. Cun il concordat vegnan reglads differents geners d'obligaziuns da permissiun per furnir prestaziuns da segirezza en furma d'ina lescha. Fixads vegnan er ils dretgs e las obligaziuns dals servetschs da segirezza. Las regulaziuns èn giustifitgadas objectivamain e necessarias ord vista da la cumissiun. La cumissiun sustegna unanimamain la participaziun dal chantun Grischun al concordat davart las prestaziuns da segirezza privatas edì da la conferenza da las directuras e dals directurs chantunals da giustia e polizia (CDCGP). 

Concordat davart las mesiras cunter la violenza a chaschun d'occurrenzas da sport
Per il concordat davart las mesiras cunter la violenza a chaschun d'occurrenzas da sport ha la CDCGP concludì numerusas midadas. Quellas cumpiglian principalmain l'introducziun d'ina obligaziun da dumandar ina permissiun per gieus da ballape e da hockey sin glatsch en las ligas supremas e la pussaivladad da las autoritads da conceder la permissiun sut cundiziuns. Ultra da quai duai vegnir permess da far controllas d'identitad tar las gruppas da fans. Questas controllas garanteschan a medem temp ch'i possian vegnir examinadas las visitadras ed ils visitaders areguard mesiras activas sco scumonds d'entrar en il stadion ed obligaziuns da sa preschentar a la polizia. En il chantun Grischun fiss actualmain pertutgà da questas midadas mo il club da hockey da Tavau (HCD). Malgrà tscherts dubis areguard las pussaivladads d'intervenziun per part rigurusas è la cumissiun unanimamain da l'avis che la revisiun dal concordat è raschunaivla ed inditgada. Perquai propona la cumissiun al cussegl grond d'approvar las midadas dal concordat davart las mesiras cunter la violenza a chaschun d'occurrenzas da sport.

Il cussegl grond vegn a tractar quests projects en la sessiun da favrer 2015. 
 

Infurmaziuns:
president da la cumissiun Alessandro Della Vedova, tel. 078 735 05 86 
 

Gremi: cumissiun per giustia e segirezza
Funtauna: rg cumissiun per giustia e segirezza