Cuntegn da la pagina

Il Grischun a l'Expo Milano 2015

  • Erste Mitteilung
  • Neuen Beitrag einfügen

A l'Expo 2015 a Milaun sa preschenta il Grischun ensemen cun ils chantuns dal Gottard Tessin, Uri e Vallais en il pavigliun svizzer, il "Padiglione Svizzero". Ultra da l'exposiziun cuminaivla "Acqua per l'Europa" vegn er il Grischun a porscher differentas occurrenzas.

Dal 1. da matg fin ils 31 d'october 2015 ha lieu a Milaun l'exposiziun mundiala cun il tema "Nutrir il planet, energia per la vita". La finamira principala da l'engaschament grischun è quella ch'il Grischun vegnia percepì anc meglier sco vischin simpatic che porscha ina gronda valur da temp liber, ina viva italianitad sco er cundiziuns generalas optimalas per l'economia. Il project da la preschientscha grischuna a l'Expo vegn manà da Markus J. Haltiner. Plinavant po la regenza quintar cun ils servetschs da l'anteriur cusseglier guvernativ Claudio Lardi, che tgira buns contacts cun l'Italia e represchenta il chantun en ils gremis da l'Expo da la confederaziun e dals chantuns dal Gottard. 

San Gottardo: quatter chantuns da cuminanza
Ils chantuns dal Gottard Tessin, Uri, Vallais e Grischun èn represchentads a l'Expo 2015 cun l'exposiziun cuminaivla "Acqua per l'Europa". Entaifer il pavigliun svizzer vegnan quests quatter chantuns a manar in local d'exposiziun sut il num "San Gottardo". In monolit da crap dal Gottard furma sco reliev il center da l'exposiziun. Chanals da sauaziun istorics vallesans – uschenumnadas "suonen" – pendan sur ils chaus da las visitadras e dals visitaders e laschan cular l'aua sur il monolit. Films davart ils chantuns e cartas postalas sco souvenirs cumpletteschan l'exposiziun. Avrir ils dis d'occurrenza cuminaivels avra l'uniun Alpinavera ils 3 da matg 2015 cun "Il sapore delle Alpi". Cun in percurs per ils senns vegnan intermediadas infurmaziuns davart la producziun persistenta da victualias en il territori alpin. Ils 5 da zercladur 2015 ha lieu il di d'acziun "AcquaViva San Gottardo", nua che classas da scola da tut ils chantuns dal Gottard portan aua frestga dals begls da lur vitgs directamain a Milaun. Ulteriurs temas cuminaivels èn – ultra da l'aua – la fundaziun d'interpresas, il forum per "Italianità in Svizzera", la NEAT sco er il turissem persistent. 

Dis grischuns a l'Expo
Dals 8 fin ils 11 da zercladur e dal 1. fin ils 5 d'october stattan a disposiziun al Grischun la tribuna, l'auditori e la sala d'occurrenzas dal pavigliun svizzer. Uschia vegn purschida ina plattafurma a las represchentantas ed als represchentants grischuns dals secturs turissem, economia e cultura. Dals 8 fin ils 10 da zercladur datti a l'Expo ina preschentaziun cuminaivla da las destinaziuns turisticas Engiadina/San Murezzan, Bregaglia/Engiadina, Valposchiavo, Viamala sco er Son Bernardin/Mesolcina/Calanca. Ensemen cun il parc naziunal svizzer mussan els moduls da l'exposiziun da giubileum interactiva ch'è vegnida fatga per il giubileum da 100 onns dal parc naziunal. L'organisaziun turistica Engiadina San Murezzan represchenta plinavant il Grischun al di da Svizra turissem dals 5 da matg 2015. Ultra da quai vegn la regiun Valposchiavo, ensemen cun la Valtellina, a far reclama a l'Expo per il project "Valtellina Valposchiavo". Dal sectur da la cultura vegnan differentas furmaziuns a sa mussar a l'Expo durant ils dis grischuns. En collavuraziun cun l'uffizi da cultura vegn actualmain fatga in'evaluaziun, e partenaris interessads èn envidads da sa participar a la preschentaziun. Ils 10 da zercladur 2015 è il di da las autoritads, che vegn frequentà er da commembras e commembers da la regenza e dal cussegl grond.

Dals 6 da zercladur fin ils 25 d'october 2015 augmenta il chantun Grischun las capacitads existentas dal traffic public. Mintga di va in auto da posta supplementar (Expo express) la damaun da Cuira a Bellinzona e la saira enavos. Quests curs spezials porschan ina colliaziun directa cun ils trens spezials che vegnan da Turitg e che van fin a la staziun da l'Expo "Rho Fiera Milano Expo 2015".


Infurmaziuns:
- Markus Haltiner, manader dal project Grischun Expo Milano 2015, uffizi per economia e turissem, tel. 081 257 23 64 u 079 467 14 64, e-mail: markus.haltiner@awt.gr.ch
- Claudio Lardi, delegà dal chantun Grischun, tel. 079 610 44 55, e-mail: avvocato@claudiolardi.ch


Gremi: uffizi per economia e turissem
Funtauna: rg uffizi per economia e turissem

Neuer Artikel