Tenor la constituziun federala èn da princip ils chantuns responsabels per la protecziun da lur populaziun. Els han cunzunt l'incumbensa da planisar il cumbat cunter eveniments en situaziuns extraordinarias che pericliteschan la populaziun e sias basas da viver. Plinavant èn ils chantuns responsabels per prender e realisar las mesiras ch'èn necessarias per reducir la periclitaziun e per dumagnar eveniments extraordinaris. Per quest motiv ha la regenza incumbensà il favrer 2013 l'uffizi da militar e da protecziun civila d'elavurar in'analisa cumplessiva da las periclitaziuns per il chantun Grischun.
Il motiv per far questa analisa è stà il basegn da survegnir ina survista pli differenziada dal potenzial da privel d'eveniments pussaivels. Per far l'analisa è il team da project sa basà sin il mussavia KATAPLAN da l'uffizi federal da protecziun da la populaziun.
La regenza ha prendì enconuschientscha dal rapport davart l'analisa da las periclitaziuns. Las periclitaziuns mussadas en il rapport èn ina basa impurtanta per sviluppar vinavant e per optimar la protecziun da la populaziun.
L'analisa da las periclitaziuns è in instrument impurtant per identifitgar ulteriuras mesiras che gidan a reducir las ristgas en connex cun la planisaziun preventiva sco er per metter prioritads en il rom da la realisaziun d'eventualas mesiras.
Ciclus dal management integral da las ristgas en la protecziun da la populaziun or dal mussavia KATAPLAN 2013
Analisà 23 periclitaziuns
Cun l'accumpagnament d'ina cumissiun directiva cun commembers da l'administraziun chantunala ha la firma Ernst Basler + Partner SA analisà l'onn passà las ristgas da 23 periclitaziuns relevantas per il chantun Grischun dals secturs natira, tecnica e societad. Far in'analisa da las periclitaziuns è ina incumbensa interdisciplinara. Perquai èn tut ils posts chantunals pertutgads vegnids involvids en la realisaziun, en spezial l'uffizi da guaud e privels da la natira, l'uffizi per la natira e l'ambient, l'uffizi d'energia e da traffic, l'uffizi da construcziun bassa, l'uffizi per la segirezza da victualias e per la sanadad d'animals, l'uffizi d'informatica, l'assicuranza d'edifizis, la polizia chantunala, l'uffizi da sanadad sco er l'uffizi da militar e da protecziun civila.
La ristga la pli gronda per il chantun Grischun deriva d'ina pandemia. Las ristgas las pli grondas dal sectur privels da la natira derivan da las periclitaziuns tras malauras e tras terratrembels. Er ina interrupziun da l'electricitad restrenscha massivamain la vita publica. Resultar resultan fitg gronds donns materials e custs consecutivs.
Ulteriur proceder
La regenza ha incumbensà l'uffizi da militar e da protecziun civila d'examinar ensemen cun ils partenaris da la protecziun da la populaziun, sche las mesiras prendidas fin ussa èn suffizientas per reducir las ristgas. L'attenziun sto vegnir drizzada en quest connex sin las periclitaziuns che vegnan designadas en l'analisa sco periclitaziuns relevantas. Plinavant stoi vegnir examinà, sch'ils meds persunals, materials ed organisatorics da la protecziun da la populaziun bastan per dumagnar ina situaziun extraordinaria che resulta, sch'i dat ina periclitaziun designada en l'analisa sco periclitaziun relevanta. Sche l'examinaziun mussass ch'il meds na bastassan betg, stuess l'uffizi da militar e da protecziun civila elavurar in catalog da mesiras per eliminar questa mancanza. Suenter fissi lura l'incumbensa da la politica da decider, sche e co che quests deficits duessan vegnir eliminads.
Mussavia KATAPLAN – Analisa da las periclitaziuns e prevenziun
Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail:
Christian.Rathgeb@djsg.gr.ch
Gremi: departament da giustia, segirezza e sanadad dal Grischun
Funtauna: rg departament da giustia, segirezza e sanadad dal Grischun