La regenza grischuna augmenta la contribuziun al program d'interreg "Italia–Svizra". Ultra da quai surdat ella l'incumbensa per la cussegliaziun per mammas e per babs e deliberescha in sustegn finanzial per il lavuratori ARGO Cuira.
Il Grischun augmenta la contribuziun al program d'interreg "Italia–Svizra"
Il chantun Grischun è interessà d'intensivar en general la collavuraziun cun l'Italia per sviluppar ils spazis economics da tuttas duas varts dal cunfin. In instrument per promover questa collavuraziun è il program d'interreg "Italia–Svizra". La quota dal chantun Grischun per las contribuziuns a projects duai importar da nov 3,36 milliuns francs. Quai sut la premissa ch'ils auters partenaris svizzers dal program, ils chantuns Tessin e Vallais, dublegian er lur contribuziuns finanzialas.
Ils temas dal program d'interreg "Italia–Svizra" 2014 fin 2020 èn la cumpetitivitad da las interpresas, la valurisaziun dal patrimoni cultural e natiral, la mobilitad integrada e persistenta, l'integraziun sociala sco er la collavuraziun sin plaun administrativ.
Contribuziun per l'observatori fisical-meteorologic/Center mundial da radiaziun a Tavau
Als custs da gestiun da l'observatori fisical-meteorologic/Center mundial da radiaziun a Tavau vegn concedida ina contribuziun chantunala annuala da var 500 000 francs per ils onns 2016 fin 2019. Premessas vegnan la contribuziun annuala da la confederaziun da passa 1,51 milliuns francs sco er la contribuziun da la vischnanca da Tavau da passa 651 000 francs.
Il center a Tavau è il post da calibraziun internaziunal d'apparats per la mesiraziun da la radiaziun ultravioletta. Pervia da l'effect ambivalent da la radiaziun ultravioletta per l'uman e per l'ambient crescha fermamain l'interess internaziunal per questa cumponenta da radiaziun. Er l'interess dal chantun Grischun vi dals resultats da questas retschertgas è grond en vista a la midada dal clima ed en vista a las consequenzas pussaivlas da quella per la populaziun muntagnarda.
La regenza surdat l'incumbensa per la cussegliaziun per mammas e per babs
L'incarica da prestaziuns da servetsch per la cussegliaziun per mammas e per babs en il chantun Grischun vegn surdada per il 1. da schaner 2016 a l'uniun KJBE (cussegliaziun d'uffants e da giuvenils). Als custs d'installaziun e d'investiziun vegn garantida ina contribuziun chantunala da passa 274 000 francs. Ultra da quai survegn l'uniun KJBE ina contribuziun chantunala da var 1,45 milliuns francs per l'onn 2016 per realisar la cussegliaziun per mammas e per babs.
Cun l'entrada en vigur da la refurma da la gulivaziun da finanzas (refurma da la GF) per il 1. da schaner 2016 vegn il chantun ad esser cumpetent per la cussegliaziun per mammas e per babs. En la missiva tar la refurma ha la regenza explitgà che l'incumbensa vegnia surdada ad organisaziuns privatas a maun d'ina incarica da prestaziun.
Sustegn finanzial per engrondir il lavuratori ARGO a Cuira
La regenza grischuna conceda a la fundaziun grischuna per lavuratoris e dimoras per persunas cun impediments, ARGO, ina contribuziun da 341 000 francs per engrondir e per midar l'utilisaziun dal lavuratori ARGO a Cuira.
Ils locals da producziun existents dal lavuratori ARGO a Cuira èn per part suroccupads e duain vegnir engrondids cun midar parzialmain l'utilisaziun d'in local da deposit. Actualmain vegnan occupadas 196 persunas en ina plazza da lavur protegida.
La regenza prenda posiziun davart differents projects da consultaziun da la confederaziun
La regenza sustegna las adattaziuns d'ordinaziuns en il rom da la nova finanziaziun ed amplificaziun da l'infrastructura da viafier (FAIV). Il chantun Grischun è da l'avis ch'en spezial la soluziun da finanziaziun preschentada saja equilibrada e gista.
Plinavant beneventa la regenza la midada da l'ordinaziun tar la lescha davart credits da consum (tschains maximals). Ella sustegna ils arguments dal cussegl federal, tenor ils quals la reducziun previsa dals tschains maximals da 15 a 10 pertschient saja in instrument adequat per cumbatter cunter la surdebitaziun. Questa intervenziun dal stadi en la concurrenza saja proporziunala.
La regenza approvescha cunvegnas da prestaziun e conceda daners da cultura
La cunvegna da prestaziun tranter il chantun Grischun ed il teater da Cuira per ils onns 2015 fin 2018 vegn approvada. Per questa perioda survegn il teater da Cuira mintga onn ina contribuziun chantunala en l'autezza da 400 000 francs. Ultra da quai vegn approvada la cunvegna da prestaziun tranter il chantun Grischun e la filarmonia da chombra dal Grischun per ils onns 2015 fin 2018. La filarmonia da chombra dal Grischun survegn ina contribuziun chantunala annuala en l'autezza da 408 000 francs per questa perioda.
Ulteriuras infurmaziuns: Promoziun da la cultura dal Grischun
Il project per survegliar il Vadret dal Cambrena è vegnì approvà
La regenza approvescha il project per survegliar il Vadret dal Cambrena.
En il rom dal project grond "Lagobianco" èsi vegnì fatg in giudicament dals privels detaglià per il Vadret dal Cambrena. Il giudicament dals privels ha mussà ch'igl è da quintar potenzialmain per ils onns 2015 fin 2025 cun sbuvadas da glatsch pli grondas. En cas d'eventuals seracs èn periclitads l'implant da gera sin il delta dal Cambrena, la senda da viandar ed il lai d'accumulaziun Lagobianco. Sin basa da questas enconuschientschas ha la vischnanca da Puschlav incumbensà l'uffizi da guaud e privels da la natira d'examinar e d'elavurar mesiras tecnicas per reducir la situaziun da privel.
Il project per survegliar il Vadret dal Cambrena prevesa da survegnir a temp infurmaziuns davart eventuals seracs, e quai cun agid d'ina camera da surveglianza. La regenza conceda ina contribuziun da maximalmain 34 000 francs per il project.
La regenza approvescha la revisiun parziala da la planisaziun locala da la vischnanca da Panaduz
La revisiun parziala da la planisaziun locala, ch'è vegnida concludida da la vischnanca da Panaduz ils 3 da december 2014, vegn approvada. Sco singuls meds da planisaziun ha la regenza approvà la revisiun parziala da la lescha da construcziun sco er il plan da zonas e plan general da furmaziun 1:1000 "Viauls". Ultra dal bain forestal è planisà in implant per laina dad arder dal tuttafatg mecanisà. Per quest intent è necessaria in'adattaziun da la zona da construcziun respectivamain in regruppament dal guaud.
Per la nova zona d'industria e da mastergn è vegnida inoltrada ina dumonda da runcar ch'è medemamain vegnida approvada dal chantun. La prestaziun cumpensatorica per la runcada ha lieu tras la replantaziun d'ina surfatscha da la medema dimensiun.
Gremi: regenza
Funtauna: rg chanzlia chantunala dal Grischun