Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per sanadad e fatgs socials propona al cussegl grond d'acceptar la missiva da la regenza tar la revisiun parziala da la lescha davart ils dis da paus publics. 

La cumissiun per sanadad e fatgs socials ha predeliberà la missiva da la regenza tar la revisiun parziala da la lescha davart ils dis da paus publics. La sesida è vegnida presidiada da la deputada e presidenta da la cumissiun Christina Bucher-Brini. Sa participà a la sesida è er il president da la regenza Martin Jäger, schef dal departament d'educaziun, cultura e protecziun da l'ambient.

La lescha actuala davart ils dis da paus publics è vegnida relaschada avant stgars 30 onns e n'è betg vegnida midada fin ussa. En il fratemp èn sa midadas las disas socialas sco er las ideas da la populaziun areguard ils firads. La revisiun parziala da la lescha che vegn proponida da la regenza tegna quint da quests fatgs. Occurrenzas che servan a la sanadad, a la recreaziun, al sport, a la cultura u al divertiment, duain esser permessas en il futur er durant ils dis da paus publics, sch'ellas na cuntrafan betg a l'intent da la lescha – numnadamain a la protecziun dal paus. Ils auts firads (Venderdi sontg, Dumengia da Pasca, Dumengia da Tschuncaisma, Di da la rogaziun federala e Di da Nadal) duain las occurrenzas vegnir admessas mo cun ina permissiun da la vischnanca. Il basegn da quietezza, da recreaziun e da solennitad duai vegnir respectà er vinavant.

La cumissiun accepta unanimamain il project. Ina minoritad da la cumissiun fa anc la proposta d'introducir il 1. da matg sco di da paus public en il Grischun.

Il cussegl grond vegn a tractar questa fatschenta en la sessiun d'avrigl 2015. 
 

Infurmaziuns:
presidenta da la cumissiun Christina Bucher-Brini, tel. 078 818 77 72 
 

Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel