Navigation

Inhaltsbereich

  • Erste Mitteilung
  • Neuen Beitrag einfügen
A chaschun da la radunanza da primavaira da la conferenza da las directuras e dals directurs chantunals da giustia e polizia da la Svizra orientala (CDCGP-ost) è il directur grischun da giustia e polizia Christian Rathgeb vegnì elegì sco nov president da la conferenza. 

Christian Rathgeb era dapi l'onn 2012 vicepresident da la CDCGP-ost e remplazza il cusseglier guvernativ turgovian Claudius Graf-Schelling. Sco nov vicepresident è vegnì elegì Martin Bürki, cusseglier guvernativ da l'Appenzell Dadens. La gestiun surpiglia Daniel Spadin, secretari dal departament da giustia, segirezza e sanadad dal Grischun.

La conferenza ha engrazià il president partent Claudius Graf-Schelling appreziond sia lavur ch'el ha fatg dapi l'onn 2009. El è s'engaschà fermamain per ils giavischs da la CDCGP-ost che sa metta en per la collavuraziun en il sectur da la giustia e da la polizia da la Svizra orientala. Ultra da quai è la CDCGP-ost la purtadra da la Scola da polizia da la Svizra orientala. En quella vegnan scolads tenor standards unitars las appartegnentas ed ils appartegnents dals corps da polizia dals chantuns Appenzell Dador, Appenzell Dadens, Glaruna, Grischun, Schaffusa, Son Gagl e Turgovia, sco er dal Principadi da Liechtenstein e da las citads da Cuira e da Son Gagl. 
 

Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch  
- Daniel Spadin, secretari dal departament, tel. 081 257 25 11, e-mail: Daniel.Spadin@djsg.gr.ch  


Gremi: departament da giustia, segirezza e sanadad dal Grischun
Funtauna: rg departament da giustia, segirezza e sanadad dal Grischun
Neuer Artikel