En sia ultima sesida ha la regenza grischuna discutà il concept detaglià per in nov med d'instrucziun da lingua en ils idioms rumantschs. Ultra da quai ha ella deliberà meds finanzials per il project "Scolas a Berna" e per la federaziun da skis dal Grischun. 

Elavurà in concept detaglià per in nov med d'instrucziun da lingua en ils idioms rumantschs
La regenza prenda enconuschientscha dal concept detaglià da la Scola auta da pedagogia dal Grischun (SAPGR) per in nov med d'instrucziun da lingua en ils idioms rumantschs. Cun excepziun d'intgins puncts che ston vegnir repassads u concretisads, vegn il concept approvà da la regenza. Ultra da quai survegn la SAPGR l'incumbensa d'elavurar in med d'instrucziun da lingua en ils idioms.
Il med d'instrucziun planisà correspunda al stadi actual da la producziun da meds d'instrucziun ch'è caracterisada tras ina maschaida da medias da materialias stampadas e da cuntegns che vegnan pli e pli purschids online. Tschertas materialias per las scolaras ed ils scolars vegnan publitgadas tant en moda stampada sco er electronica. Quai permetta differentas furmas d'utilisaziun en l'instrucziun, sco per exempel la lavur cun in tablet. En cas da basegn sa lascha la purschida electronica plinavant adattar, midar u cumplettar. Tar l'elavuraziun dal concept detaglià èn vegnidas rimnadas regularmain reacziuns da tut las regiuns rumantschas. Uschia hai pudì vegnir cuntanschì ch'il concept chatta gronda acceptanza.
Il nov med d'instrucziun da lingua sto s'orientar vi dal Plan d'instrucziun 21. Er la grammatica e l'ortografia ston vegnir integradas en quest senn. La regenza vegn a deliberar il plan d'instrucziun per il sectur spezial rumantsch sco lingua da scola previsiblamain l'atun 2015, pia avant il Plan d'instrucziun 21 cumplet. Tenor l'urari cumenza l'elavuraziun dal nov med d'instrucziun da lingua en ils idioms però gia la stad 2015. Perquai pon vegnir elavurads l'emprim mo quels cuntegns, dals quals l'orientaziun vi dal Plan d'instrucziun 21 è incontestada. Materialias stampadas dastgan vegnir producidas pir, cur che las dumondas anc avertas davart il plan d'instrucziun per il sectur spezial da rumantsch sco lingua da scola èn scleridas definitivamain. 
 
La regenza sustegna la cuntinuaziun dal project "Scolas a Berna"
Il project "Scolas a Berna" da l'uniun cun il medem num duai cuntinuar er l'onn 2016. Per quest intent conceda la regenza ina contribuziun chantunala or dal fond da la lottaria naziunala d'in import da maximalmain 40 000 francs. Il project permetta a scolaras ed a scolars da far experientschas cun la politica naziunala directamain en il center da l'acziun a Berna. Ils ultims onns èn vegnidas realisadas 25 emnas da project cun passa 2500 scolaras e scolars da l'entira Svizra. 
  La novavla classa da la scola da Cazas ha visità la chasa federala a Berna il favrer 2015. 
 
La generaziun giuvna da snowboard e da freeski vegn promovida pli sistematicamain
La regenza grischuna sustegna la federaziun da skis dal Grischun cun 70 000 francs. L'import va a favur da las partiziuns da snowboard e da freeski. En quests dus secturs vul la federaziun da skis dal Grischun accentuar la promoziun da la generaziun giuvna. Per quest intent engascha ella trais ulteriurs trenaders. Quai per tegnair quint da l'augment dal nivel da prestaziun internaziunal, per pudair assister il dumber creschent d'atletas e d'atlets e per als facilitar la via al sport da prestaziun. 

Sustegn finanzial per il project "Atelier d'abitar a Vienna"
Il project cultural "Atelier d'abitar a Vienna" vegn sustegnì per trais ulteriurs onns. La regenza conceda ina contribuziun finanziala da totalmain 150 000 francs per ils onns 2016 fin 2018. Il project permetta ad artistas ed ad artists professiunals dal Grischun d'absolver ina dimora da tschintg mais en in atelier a Vienna. Per quest intent metta il chantun Grischun a disposiziun gratuitamain in atelier d'abitar e conceda in pajament supplementar als custs da viver. 

L'administraziun chantunala sa participescha a l'acziun "bike to work 2015"
L'administraziun chantunala sa participescha l'onn 2015 danovamain a l'acziun "bike to work" da la Pro velo Svizra. La regenza ha surdà l'organisaziun a l'uffizi da sanadad. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur dal mais da zercladur. Pussaivla è er ina cumbinaziun da traffic public e velo. A chaschun da l'acziun da l'onn passà han 78 equipas da l'administraziun chantunala cun stgars 308 participantas e participants fatg tut en tut var 38 972 kilometers. 
 
flyer "bike to work" 

La regenza grischuna beneventa las midadas da la lescha federala davart la navigaziun interna
La regenza grischuna prenda posiziun tar la revisiun parziala da la lescha federala davart la navigaziun interna. Ella beneventa en quest connex en spezial l'introducziun da controllar e da cumprovar l'alcohol en il flad, propona però da pudair ordinar vinavant in'analisa dal sang e da l'urin, sch'il suspect da la polizia, ch'i sa tractia d'in consum maschadà (alcohol ensemen cun drogas u cun medicaments), è motivà. D'accord va ella er cun l'introducziun da controllas medicalas periodicas per tut las manischunzas ed ils manischunzs da bartgas a partir da 70 onns. En il traffic sin via vala quai gia oz. 
 
 
Gremi: regenza
Funtauna: rg chanzlia chantunala dal Grischun