Cuntegn da la pagina

Tegnida che tegna quint dals basegns dals animals da cumpagnia

  • Erste Mitteilung
  • Neuen Beitrag einfügen
Animals da cumpagnia èn animals ch'ils umans tegnan cunzunt per motivs emoziunals. Per tegnair quests animals en ina moda correcta e per satisfar als basegns dals animals ston vegnir ademplidas grondas pretensiuns. A l'exposiziun da commerzi, d'industria e da mastergnanza (HIGA) en il rom da l'exposiziun speziala "Mund dals animals da cumpagnia" dat l'uffizi per la segirezza da victualias e per la sanadad d'animals dal Grischun ina invista pli profunda en ina tegnida che tegna quint dals basegns dals animals e ch'è confurma a las leschas sco er en la tgira da differents animals da cumpagnia.

En il chantun Grischun vegnan tegnids ca. 100 000 animals da cumpagnia. Dad els fan part per exempel giats, utschels u amfibis. Igl è impurtant che las possessuras ed ils possessurs d'animals da cumpagnia enconuschian las pretensiuns da lur animals ed als tegnian en ina moda che tegna quint da lur basegns. Er tar possessuras e possessurs d'animals da cumpagnia che han ina lunga experientscha pon lur ignoranza, lur inattenziun u lur amur malchapida chaschunar problems cun la protecziun dals animals. La cussegliaziun en negozis spezials e l'infurmaziun or da cudeschs u or da l'internet gidan a s'acquistar la savida teoretica fundamentala – savens na datti dentant nagina pussaivladad da s'infurmar en la pratica en ina moda cumplessiva e "live" davart la tegnida e davart la tgira d'animals da cumpagnia.

A la HIGA dat l'uffizi per la segirezza da victualias e per la sanadad d'animals dal Grischun scleriment ensemen cun differents partenaris. La finamira da l'exposiziun speziala "Mund dals animals da cumpagnia" è quella d'infurmar las possessuras ed ils possessurs d'animals en ina moda che sa referescha al tema e ch'è bain chapibla e da sensibilisar ellas ed els per las pretensiuns da la tegnida d'animals da cumpagnia. Visitadras e visitaders survegnan ultra da quai l'occasiun da vesair directamain in grond dumber d'animals da cumpagnia. L'exposiziun speziala dura dals 9 fin ils 16 da matg 2015. 


Infurmaziuns:
Dr. Rolf Hanimann, veterinari chantunal, uffizi per la segirezza da victualias e per la sanadad d'animals dal Grischun, telefon 081 257 24 11, e-mail: Rolf.Hanimann@alt.gr.ch 


Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals
Neuer Artikel