Cuntegn da la pagina

Communicaziun da la regenza dals 7 da matg 2015

  • Erste Mitteilung
  • Neuen Beitrag einfügen
A chaschun da sia ultima sesida ha la regenza grischuna approvà las revisiuns parzialas da las planisaziuns localas da Cuira e da Puntraschigna. Plinavant fa il chantun Grischun ina donaziun per las victimas dal terratrembel en Nepal.

Donaziun dal chantun Grischun per las victimas dal terratrembel en Nepal
Il chantun Grischun sustegna las victimas dal terratrembel en Nepal e fa ina donaziun da 20 000 francs a la Crusch cotschna svizra. Il terratrembel dals 25 d'avrigl ha chaschunà la mort da millis umans, in dumber nunenconuschent da persunas è senza tetg. En spezial la chapitala Kathmandu, ma er numerusas autras regiuns èn tutgadas fermamain. La Crusch cotschna svizra coordinescha al lieu l'administraziun e la distribuziun da la rauba d'agid e sustegna la Crusch cotschna nepalaisa.
Tenor la constituziun chantunala sustegna il Grischun l'agid umanitar per umans e per pievels basegnus. Il chantun porscha mintga onn agid spontan en cas da crisas e da catastrofas en Svizra ed a l'exteriur. Ultra da l'agid en cas da catastrofas sustegna el projects d'organisaziuns d'agid svizras renconuschidas e d'iniziants locals che han la finamira da meglierar las cundiziuns da viver, sco er d'endrizzar manaschis da lavur e da producziun e projects d'infrastructura raschunaivels. Mintga onn stat a disposiziun in preventiv ordinari da 130 000 francs. Sche questa summa na basta betg, po ella vegnir augmentada adequatamain tras auters meds finanzials.

La regenza approvescha la revisiun parziala da la planisaziun locala da Cuira
La regenza grischuna approvescha la revisiun parziala da la planisaziun locala da Cuira che cumpiglia il plan d'areal 1:1000 "Kleinbruggen". "Kleinbruggen" designescha ina surfatscha tranter il Obertorer Mühlbach tar la Pulvermühle, il Rossboden ed ils binaris da la viafier. L'areal che n'è per gronda part betg surbajegià ha in grond potenzial sco territori d'abitadi e da servetschs e sco territori cun in'ecologia eterogena. Per stgaffir premissas optimalas per quest territori ha la citad da Cuira suttamess l'onn 2006 ina surfatscha da circa 16 hectaras a l'obligaziun da far in plan d'areal.
En il fratemp ha gì lieu ina concurrenza da construcziun urbana per diversas parcellas cun la finamira da mussar in muster da surbajegiada pussaivel e da crear in areal d'abitadi e da lavur d'auta qualitad cun ina valur da recreaziun vischina. Cun il plan d'areal vegnan ussa determinadas las cundiziuns generalas per sviluppar vinavant il territori e creadas las premissas per realisar il plan da quartier. Uschia cuntegna il plan d'areal tranter auter in territori cun passa 50 plazzas da parcar accessiblas publicamain e regulaziuns per l'avertura da la zona da protecziun da la natira.
-
© Comet Photoshopping GmbH / Dieter Enz
 
La regenza approvescha la revisiun parziala da la planisaziun locala da Puntraschigna

La revisiun parziala da la planisaziun locala, concludida da la vischnanca da Puntraschigna ils 2 da december 2014, vegn approvada. Sco singuls meds da planisaziun èn vegnids approvads il plan da zonas, il plan general da furmaziun ed il plan general d'avertura 1:1000 "Sportpavillon".
La revisiun parziala cumpiglia la midada d'ina parcella da 9200 meters quadrat da la zona per edifizis e per stabiliments publics a la zona d'hotel "Sportpavillon". Tras questa adattaziun stgaffescha la vischnanca las premissas en la planisaziun dal territori per pudair realisar in project d'hotel en il territori "Pro Chinun suot Via". Ultra da quai èsi planisà da renovar tut ils stabiliments da sport sco er da construir in restaurant.
-
© Comet Photoshopping GmbH / Dieter Enz


Gremi: regenza
Funtauna: rg chanzlia chantunala dal Grischun
Neuer Artikel