Cuntegn da la pagina

Communicaziun da la regenza dals 28 da matg 2015

  • Erste Mitteilung
  • Neuen Beitrag einfügen
En sia ultima sesida ha la regenza grischuna prendì posiziun tar differentas consultaziuns da la confederaziun. Ultra da quai ha ella deliberà contribuziuns finanzialas per la renovaziun da mirs sitgs en il chantun sco er per il project gimnastica ma-pi.

Consultaziun per in sistem directiv da clima e d'energia
La regenza prenda posiziun tar ina nova disposiziun constituziunala per in sistem directiv da clima e d'energia. Cunquai ch'il project regla in sectur ch'è d'impurtanza centrala per ils chantuns alpins, ha la conferenza da las regenzas dals chantuns alpins (CRCA) decidì da rediger ina resposta da consultaziun cuminaivla. La regenza dal chantun Grischun sustegna dal tuttafatg questa posiziun da la CRCA. Ella è da l'avis ch'i saja impurtant ed urgent da remplazzar il model da promoziun actual da l'indemnisaziun per cuvrir ils custs da la furniziun d'electricitad (ICF) tras in model pli confurm al martgà, da preferenza in model da quotas. Uschia stuessan las consumentas ed ils consuments finals resp. lur interpresas da provediment cuvrir ina part definida da lur consum d'electricitad cun energia regenerabla indigena. La quota correspundenta vegn augmentada periodicamain sin basa da las finamiras politicas, fin ch'i vegn cuntanschida l'onn 2050 en il cas optimal ina quota da 100 pertschient. La regenza grischuna sustegna ultra da quai explicitamain la posiziun menziunada che la confederaziun na fetschia naginas intervenziuns en las cumpetenzas dals chantuns en il sectur dals edifizis. Tut las intervenziuns, er sch'ellas vegnan mo tratgas en consideraziun, refusa la regenza en moda categorica.
En il rom da la segunda etappa da la strategia d'energia 2050 cun realisaziun a partir da l'onn 2021 ha il cussegl federal decidì da remplazzar il sistem da promoziun vertent pass per pass tras in sistem directiv. La disposiziun constituziunala proponida duai extender las pussaivladads da taxas da clima e d'energia e francar en la constituziun la midada dal sistem da promoziun al sistem directiv.
 
Posiziun RKGK
 
La regenza beneventa mesiras pli fermas cunter littering
La regenza grischuna beneventa l'iniziativa parlamentara "Rinforzar las mesiras cunter il laschar enavos ruments (littering)". L'iniziativa pretenda che la lescha federala davart la protecziun da l'ambient vegnia cumplettada cun ina norma da cumportament e cun ina norma penala davart il littering. Tenor la regenza è il project in pass impurtant per concluder ina regulaziun unitara e definitiva per l'entira Svizra davart il scumond da bittar davent e da laschar enavos ruments chasans. Tras quella daventan obsoletas las regulaziuns chantunalas e communalas existentas.
Il littering è primarmain in problem social e betg in problem da la gestiun da ruments. Laschar enavos u bittar davent per negligientscha ruments da tut gener sin vias, sin plazzas u en il guaud è vegnì pli e pli en moda e la dismessa chaschuna custs considerabels per ils chantuns e las vischnancas. Mesiras repressivas sco multas cunter las persunas culpaivlas èn perquai giustifitgadas. Quellas na vegnan però betg a bastar per midar il cumportament. A medem temp ston vegnir prendidas mesiras sensibilisantas, educativas e tecnicas per cuntanscher ina reducziun evidenta dal littering. 

La regenza beneventa la revisiun totala da la lescha federala davart analisas geneticas tar l'uman
La regenza grischuna beneventa l'adattaziun da la lescha davart analisas geneticas tar l'uman. Ella renda dentant attent al fatg che la realisaziun da la revisiun totala po chaschunar lavur supplementara considerabla per las medias ed ils medis en connex cun dumandar il consentiment ed infurmar las pazientas ed ils pazients. Perquai propona ella d'examinar las disposiziuns areguard lur praticabilitad e da las curreger correspundentamain. La regenza na va betg d'accord cun la regulaziun proponida en connex cun la protecziun da datas, la quala sto vegnir precisada urgentamain.
Ils svilups tecnics dals ultims onns han midà en moda radicala la qualitad d'analisas geneticas, lur champs d'applicaziun e pia la situaziun dals labors. Cun la revisiun totala da la lescha federala duai vegnir tegnì quint da quest svilup. Per exempel duain tests genetics tar l'uman dastgar vegnir purschids en l'avegnir er ordaifer il sectur medicinal. Er las pretensiuns per far analisas prenatalas vegnan precisadas. 

Realisaziun da las mesiras cunter la violenza a chaschun d'occurrenzas da sport
Il favrer 2015 ha il cussegl grond approvà las midadas dal concordat davart las mesiras cunter la violenza a chaschun d'occurrenzas da sport. Las midadas èn entradas en vigur ils 21 da matg 2015. Il concordat midà prevesa en spezial l'introducziun d'ina obligaziun da permissiun per gieus da ballape e da hockey sin glatsch en las ligas supremas. Las autoritads ch'èn cumpetentas han ultra da quai la pussaivladad da conceder la permissiun sut cundiziuns. Plinavant po l'autoritad cumpetenta autorisar las interpresas privatas da segirezza incaricadas da far perquisiziuns da persunas e da tschertgar objects scumandads en il rom da la controlla d'access. A medem temp vegn ussa messa en vigur l'adattaziun da l'ordinaziun da polizia. Ella fixescha l'autoritad ch'è cumpetenta per las permissiuns da gieu e per l'ordinaziun da las mesiras ch'èn vegnidas introducidas da nov. 

Contribuziuns per la renovaziun da mirs sitgs
Per renovar mirs sitgs en las vischnancas d'Andeer, Arosa, Bravuogn, Bregaglia, Brusio, Casti-Vargistagn, Cuira, Jenins, Puschlav, Sta. Maria i.C., Scuol, Tumein, Tumleastga, Val S. Pieder e Zernez deliberescha la regenza ina contribuziun chantunala da 321 270 francs or dal fond da la lottaria naziunala. La confederaziun paja ina contribuziun da la medema autezza. Ils mirs sitgs, sco mirs da cunfin e da sustegn, èn en bleras regiuns dal Grischun perditgas impurtantas d'ina cultivaziun tradiziunala. Ultra da quai èn mirs sitgs savens spazis da viver impurtants per reptils. Els n'han betg mo ina gronda impurtanza per l'istorgia culturala, mabain er per l'ecologia e per la cuntrada. Senza mantegniment van blers da quests mirs en decadenza.
-
Renovaziun d'in mir sitg a Sumvitg, © Parc Adula 

La regenza sustegna la cuntinuaziun dal project gimnastica ma-pi
La regenza grischuna sustegna la cuntinuaziun dal project gimnastica ma-pi da la federaziun grischuna da gimnastica cun ina contribuziun or dal fond da sport. Per ina durada da 3 onns conceda ella maximalmain 180 000 francs. La gimnastica ma-pi (gimnastica mamma pitschen; cumpiglia medemamain la gimnastica bab pitschen, furma curta: ba-pi) duai vegnir purschida en tut il chantun en fitg buna qualitad. Cunzunt en las regiuns dal Grischun talian, da la Surselva sco er dal Surses è avant maun ulteriur potenzial per scolar e perfecziunar anc dapli manadras e manaders. Tar las finamiras da la proxima fasa dal project tutgi da serrar questas largias. Il project gimnastica ma-pi è vegnì inizià la stad 2009 e duai entusiasmar uffants da la vegliadetgna prescolara da far sport, e quai cun ina purschida da moviment d'auta qualitad e confurma a la vegliadetgna. 
 

Gremi: regenza
Funtauna: rg chanzlia chantunala dal Grischun



Neuer Artikel