Cuntegn da la pagina

Il zercladur salva il cussegl grond sia sessiun extra muros ad Arosa

  • Erste Mitteilung
  • Neuen Beitrag einfügen
Dals 15 fin ils 18 da zercladur 2015 vegn il cussegl grond a salvar ina sessiun extra muros ad Arosa. Questa sessiun en la regiun vegn actualmain preparada cun plaina forza.

Ina giada per legislatura salva il cussegl grond ina sessiun ordaifer Cuira. Questa sessiun extra muros ha ina gronda impurtanza per tgirar il contact cun la populaziun dal Grischun en las regiuns. Sin proposta da la conferenza da las presidentas e dals presidents ha il parlament tschernì l'avrigl da l'onn passà Arosa sco lieu da sessiun per la proxima sessiun en la regiun. En il passà han gia gì lieu sessiuns extra muros a Mustér, a Tavau, a Landquart, a Puschlav ed a Samignun. La sessiun extra muros ad Arosa dura quatter dis, da glindesdi, ils 15 da zercladur, fin gievgia, ils 18 da zercladur 2015. La reuniun ha lieu en il center da sport e da congress. La sala da congress da quest center vegn transfurmada per quatter dis en ina sala da cussegl. Il secretariat dal cussegl grond da la chanzlia chantunala è vegnì incumbensà d'organisar questa sessiun. Actualmain vegnan las preparaziuns fatgas cun plaina forza. Per il program accumpagnant spezial durant la sessiun extra muros e per l'infrastructura tecnica necessaria al lieu procura la vischnanca ospitanta.

Program accumpagnant varià
Las deputadas ed ils deputads duain survegnir ad Arosa la pussaivladad d'emprender ad enconuscher pli bain la regiun e la populaziun. Per quest intent ha la vischnanca d'Arosa arranschà in program accumpagnant interessant e varià. Il cussegl grond vegn beneventà glindesdi, ils 15 da zercladur 2015, a las 14.00 da la suprastanza communala ad Arosa. La sessiun vegn alura averta uffizialmain a las 14.30 tras il president dal cussegl grond.
Ultra da l'occurrenza facultativa il mardi saira sin il Weisshorn, è previs in program accumpagnant uffizial la mesemna saira per las deputadas ed ils deputads. A chaschun d'ina occurrenza festiva publica duain las commembras ed ils commembers dal cussegl grond s'avischinar a la populaziun da la regiun.
 
Glista da tractandas bain chargiada
Er las sessiuns ordaifer l'edifizi dal cussegl grond servan en emprima lingia a la lavur parlamentara. Tranter auter stattan sin la glista da tractandas: il quint dal chantun 2014 cun ina revisiun parziala da la lescha chantunala da finanzas, ils rapports da gestiun da las instituziuns autonomas da dretg public dal chantun, ina revisiun parziala da la lescha davart las vias sco er il relasch d'ina lescha davart la protecziun da la populaziun e d'ina lescha davart la protecziun civila. Plinavant ha lieu l'elecziun dal presidi da la regenza per l'onn 2016. Sco usità èn las sesidas dal parlament publicas e las persunas interessadas èn cordialmain envidadas da las persequitar davent d'ina tribuna. 
 

Infurmaziuns:
- president dal cussegl grond Duri Campell, tel. 079 222 03 87
- Lorenzo Schmid, president communal d'Arosa, tel. 081 378 67 57
- Domenic Gross, manader dal secretariat dal cussegl grond, tel. 081 257 22 32 
 

Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel