Cuntegn da la pagina

Communicaziun da la regenza dals 11 da zercladur 2015

  • Erste Mitteilung
  • Neuen Beitrag einfügen
En sia ultima sesida ha la regenza approvà il plan d'areal per la plazza dal vitg da la vischnanca da Tumein. Ultra da quai ha ella deliberà in sustegn finanzial per il project "Protecziun cunter crudada da crappa Boffalora" sco er per ils projects collectivs "Selvicultura" e "Reparaziun d'ovras da protecziun". 

La regenza approvescha il plan d'areal per la plazza dal vitg da la vischnanca da Tumein
Il plan d'areal che la vischnanca da Tumein ha concludì ils 16 da zercladur 2014 vegn approvà da la regenza. Gia en ses model directiv 2002 davart la planisaziun dal territori ha la vischnanca da Tumein concludì d'augmentar la valur da la plazza dal vitg e da la concepir sco center dal vitg attractiv. En l'inventari federal dals lieus svizzers d'impurtanza naziunala degns da protecziun (ISOS) è il center dal vitg da Tumein classifitgà sco lieu d'impurtanza naziunala. Per tegnair quint da questa classificaziun è vegnì elavurà in project che definescha da nov il spazi public e che dat vita a la plazza dal vitg. Il project ch'è vegnì elavurà surpassa l'autezza dals edifizis admessa tenor la lescha da construcziun. Per quest motiv è vegnì relaschà empè d'in plan da quartier il plan d'areal per la plazza dal vitg. Quel regla ultra da las prescripziuns urbanisticas a medem temp il regruppament dal terren sco er l'avertura.
- -  
Funtauna schneller caminada architects

La regenza approvescha il project "Protecziun cunter crudada da crappa Boffalora"
La regenza grischuna approvescha il project "Protecziun cunter crudada da crappa Boffalora". Als custs vegn garantida ina contribuziun chantunala da maximalmain 158 400 francs.
Ils ultims onns hai dà en il territori "Carestia" en la vischnanca da Soazza pliras giadas crudada da crappa e grippa. Pervia da quests eveniments è vegnida elavurada ina charta da privels. Tenor questa charta sa chattan 550 meters da la via chantunala, otg stallas ed in restaurant en la zona cotschna che signifitga ina periclitaziun considerabla. La finamira dal project qua avant maun è en emprima lingia quella da garantir la protecziun dal restaurant abità. Per quai vegn il territori segirà cun in rempar da protecziun da var 50 meters lunghezza.
Tenor la legislaziun forestala federala e chantunala ston ils chantuns segirar ils territoris, nua che umans e valurs materialas considerablas ston vegnir protegids. 
 
Projects collectivs per la selvicultura e per la reparaziun d'ovras da protecziun
Per la selvicultura e per la reparaziun d'ovras da protecziun en il Grischun ha la regenza approvà mintgamai in project collectiv. Il project collectiv "Selvicultura 2015" è vegnì elavurà en collavuraziun cun var 200 proprietaris da guaud publics e privats. Sin totalmain 1980 hectaras vegn mantegnì il guaud da protecziun, promovida la diversitad da las spezias e tgirà il guaud giuven. En territoris che n'èn betg bain accessibels vegn ultra da quai promovì il transport da laina cun crana a cabel. Ils custs totals importan 18,79 milliuns francs. Finanzià vegn quest project tras meds da la confederaziun, dal chantun e dals proprietaris da guaud respectivs.
Il project collectiv "Reparaziun d'ovras da protecziun 2015" cumpiglia totalmain 48 objects, ils custs importan 7,4 milliuns francs. La finamira dal project è quella da garantir la protecziun d'abitadis e d'infrastructuras da traffic. La realisaziun dal project dura 2 onns. Engrondiments e construcziuns novas d'ovras da protecziun sco er il mantegniment current da questas ovras n'è explicitamain betg ina part integrala dal project collectiv. 


Gremi: regenza
Funtauna: rg chanzlia chantunala dal Grischun
Neuer Artikel