Navigaziun principala

Cuntegn da la pagina

La cumissiun per giustia e segirezza predeliberescha duas missivas da la regenza

  • Erste Mitteilung
  • Neuen Beitrag einfügen
La cumissiun per giustia e segirezza dal cussegl grond ha predeliberà duas missivas da la regenza. Per l'ina il relasch d'ina lescha davart la protecziun da la populaziun, per l'autra il relasch d'ina lescha davart la protecziun civila. La cumissiun sustegna ils sbozs da lescha che vegnan proponids da la regenza.

Sut la direcziun dal president da la cumissiun Alessandro Della Vedova ed en preschientscha dal cusseglier guvernativ Christian Rathgeb ha la cumissiun per giustia e segirezza predeliberà las missivas da la regenza concernent il relasch d'ina lescha davart la protecziun da la populaziun e concernent il relasch d'ina lescha davart la protecziun civila per mauns dal cussegl grond. La protecziun da la populaziun e la protecziun civila vegnan regladas actualmain en la lescha davart l'agid en cas da catastrofas che datescha da l'onn 1989. Da nov duain ils dus secturs vegnir reglads e concretisads en leschas separadas. Per la cumissiun è il basegn d'agir cleramain dà, uschia ch'ella ha acceptà unanimamain omaduas missivas. 

Lescha davart la protecziun da la populaziun
La protecziun da la populaziun regla las incumbensas da las vischnancas e dal chantun en situaziuns spezialas ed extraordinarias. Valair vala il princip che las vischnancas èn responsablas per la prevenziun e per il dumogn da tut ils eveniments sin lur territori (princip da subsidiaritad). Il chantun sustegna mo ina vischnanca, sche quella na po betg pli dumagnar sezza in eveniment. La cumissiun sustegna il sboz da la lescha che vegn proponì da la regenza. Las paucas midadas formalas che vegnan proponidas pertutgan l'executabilitad immediata d'ordinaziuns da vischnancas sco er l'exclusiun da l'effect suspensiv da recurs cunter disposiziuns da vischnancas. 

Lescha davart la protecziun civila
La protecziun civila ch'è vegnida fundada oriundamain per dumagnar conflicts armads, è oz il partenari da la protecziun da la populaziun ch'è concepida sco sistem da cooperaziun ed è pia orientada al dumogn da situaziuns extraordinarias. La repartiziun da las cumpetenzas e da las incumbensas tranter il chantun e las vischnancas, che vegn applitgada oz per part mo en la pratica, duai da nov vegnir reglada sin il stgalim d'ina lescha. Er quest sboz da la lescha da la regenza ha chattà il consentiment da la cumissiun. La cumissiun propona unicamain da midar la restituziun da contribuziuns dal chantun en connex cun l'aboliziun da stabiliments da protecziun, e quai en quel senn ch'il chantun desistia per regla d'ina restituziun, sche l'aboliziun dal stabiliment da protecziun dependa da las novas structuras d'organisaziun da la protecziun civila. La regenza prevesa en il sboz da la lescha mo ina formulaziun facultativa per quest intent.

Il cussegl grond vegn a tractar omaduas fatschentas en la sessiun da zercladur 2015. 
 
 
Infurmaziuns:
president da la cumissiun Alessandro Della Vedova, tel. 078 735 05 86


Gremi: cumissiun per giustia e segirezza
Funtauna: rg cumissiun per giustia e segirezza
Neuer Artikel