La conferenza da las scheffas e dals schefs da las regenzas da la Cuminanza da lavur da las regiuns alpinas (ARGE ALP) ha discutà oz a Lugano davart il plan da la strategia europeica per il territori alpin. Las scheffas ed ils schefs da las regenzas beneventan bain las stentas sin plaun internaziunal, pretendan dentant dapli dretgs da cundecisiun. Sco commember da la ARGE ALP conferma il chantun Grischun la resoluziun ch'è vegnida deliberada oz. 

La ARGE ALP ha lantschà l'onn 2012 il process da sviluppar, sin plaun europeic, ina strategia macroregiunala per il territori alpin. La finamira è quella da stgaffir ina basa per schliar cuminaivlamain problems actuals en l'entir territori alpin. Il Cussegl europeic beneventa las stentas da la ARGE ALP ed ha incumbensà silsuenter la cumissiun da la UE – cun cooperaziun dals stadis, da las regiuns e dals chantuns pertutgads – d'elavurar ina strategia europeica per il territori alpin (EUSALP). Las scheffas ed ils schefs da las regenzas piglian oz cogniziun dal sboz da la cumissiun da la UE. Crititgà han els che la rolla impurtanta da las regiuns alpinas e dals chantuns alpins na vegnia betg resguardada suffizientamain ni en il process da naschientscha ni en l'organisaziun previsa da la EUSALP. La collavuraziun dals differents plauns statals stoppia avair lieu en moda colleghiala e stoppia prender resguard da las cumpetenzas respectivas, accentueschan oz las scheffas ed ils schefs da las regenzas. Perquai pretendan els che las regiuns alpinas e ch'ils chantuns alpins survegnian dretgs da represchentanza e da cundecisiun adequats en l'organisaziun da la EUSALP. Il chantun Grischun dat – sco chantun muntagnard – ultra da quai gronda paisa ad ina colleghialitad equivalenta tranter las Alps centralas e las metropolas. 

Projects multifars
Sco uniun transcunfinala da diesch stadis federativs, regiuns e chantuns or da quatter pajais permetta la ARGE ALP projects cuminaivels multifars en il territori alpin. In project da success sut la direcziun dal Grischun è "ARGE ALP sport". L'onn passà han participà stgars 1800 sportistas e sportists a las nov concurrenzas che han gì lieu en l'entir territori alpin. Il segund project grischun actual s'occupa da dumondas davart l'influenza da la schelira permanenta sin bovas e sin crudada da grippa. Ils resultats dal project vegnan preschentads l'onn 2016.

A Lugano èsi vegnì lantschà er novs projects, sco per exempel in project per promover la colliaziun en ina rait da las ovras da furmaziun regiunalas u in project concernent las mesiras per renatiralisar tschertas auas currentas.

Il presidi da la ARGE ALP ha da nov il stadi federativ austriac Vorarlberg. Sco usità è il presidi vegnì surdà suenter in onn en il rom da la conferenza da las scheffas e dals schefs da las regenzas – questa giada dal Tessin. 
 

Infurmaziuns:
Chancelier Claudio Riesen, e-mail claudio.riesen@staka.gr.ch (el telefona lura enavos)

Dumondas da las medias per telefon: Tamara Kobler, incumbensada per l'infurmaziun dal chantun Grischun, tel. 079 792 19 37


Gremi: ARGE ALP / chantun Grischun
Funtauna: rg chanzlia chantunala dal Grischun