Cuntegn da la pagina

Ina planisaziun a lunga vista segirescha il guaud da protecziun dal Grischun

  • Erste Mitteilung
  • Neuen Beitrag einfügen
La planisaziun per il svilup dal guaud è ina basa indispensabla per cultivar e per tgirar il guaud en il chantun Grischun. Ils plans chantunals per il svilup dal guaud èn actualmain en elavuraziun, ils emprims dus fegls d'object èn ussa pronts per la consultaziun. 

Circa in terz da la surfatscha dal Grischun è guaud che sto vegnir cultivà ed utilisà cun cleras finamiras. Il svilup dal guaud da muntogna s'extenda sur generaziuns. Quai pretenda ina planisaziun seriusa, intenziunada ed a lunga vista. Il plan per il svilup dal guaud (PSG) procura per in'utilisaziun duraivla e segirescha ils divers interess publics envers il guaud. Ils ventg PSG existents vegnan remplazzads tras tschintg novs PSG regiunals ed illustrads cun fegls d'object. Sper ils princips chantunals pon uschia er vegnir resguardadas las particularitads da las singulas regiuns. In PSG consista da set fegls d'object che cuntegnan ils differents interess sco protecziun cunter privels da la natira, producziun da laina, natira e cuntrada, recreaziun e turissem, agricultura, spazi da viver per la selvaschina ed infrastructuras dal guaud. 

Fegls d'object guaud da protecziun e guaud da pasculaziun
Circa 70 pertschient da la surfatscha da guaud è determinada en il Grischun sco guaud da protecziun che protegia vitgs ed infrastructuras cunter lavinas, crudada da crappa e bovas. En il chantun è la funcziun da protecziun la prestaziun la pli impurtanta dal guaud. Il fegl d'object guaud da protecziun fixescha en in plan la surfatscha dal guaud da protecziun. El explitgescha las strategias che duain meglierar e segirar a lunga vista la protecziun dals guauds. Ultra da quai vegni reglà co ch'ils meds publics vegnan impundids per la tgira dal guaud da protecziun e co ch'els vegnan repartids sin las proprietarias ed ils proprietaris da guaud.

En il Grischun ha il guaud da pasculaziun ina lunga tradiziun. I sa tracta qua d'ina utilisaziun maschadada che ha la finamira d'obtegnair – ultra dals products forestals (protecziun, laina, prosperitad) – er products agriculs (pavel per il muvel).
En il fegl d'object guaud da pasculaziun vegn preschentada la situaziun actuala da la pasculaziun en il guaud e giuditgada sia influenza per il stadi dal guaud en general e particularmain per la funcziun da protecziun dal guaud. Sco resultat vegni constatà nua che la pasculaziun è permessa vinavant en il rom actual e nua ch'igl exista in basegn d'agir per reglar la pasculaziun. 

Cooperaziun en il process da planisaziun
La cooperaziun da vischnancas, da federaziuns e d'instituziuns interessadas sco er da la vasta publicitad è in pass impurtant en il process da planisaziun. Ella ha lieu en duas modas: Per l'ina sur la pagina d'internet www.wep.gr.ch creada spezialmain per la revisiun dal PSG, u convenziunalmain en scrit a l'uffizi da guaud e privels da la natira. Infurmaziuns dattan ils tschintg biros regiunals a Schiers, Tumein, Glion, Casti e Zuoz u l'uffizi da guaud e privels da la natira a Cuira. 
 

Infurmaziuns:
- Reto Hefti, selvicultur chantunal, uffizi da guaud e privels da la natira, tel. 081 257 38 51, e-mail: Reto.Hefti@awn.gr.ch 
- Riet Gordon, manader dal sectur per l'infurmaziun davart il guaud, uffizi da guaud e privels da la natira, tel. 081 257 38 55, e-mail: Riet.Gordon@awn.gr.ch 


Gremi: uffizi da guaud e privels da la natira
Funtauna: rg uffizi da guaud e privels da la natira
Neuer Artikel