Navigation

Inhaltsbereich

  • Erste Mitteilung
  • Neuen Beitrag einfügen
Chauns da protecziun da muntaneras protegian las nursas en il chantun Grischun cun success cunter animals da rapina. En il chantun turistic vegnan fatgas las pretensiuns las pli autas als chauns. Co ch'ins sto sa cuntegnair per che nagut na capitia e co ch'ils chauns vegnan scolads mussa sut www.gr.ch in nov video da la chanzlia chantunala.

Lufs-tscherver, urs ed oravant tut lufs fan – per uschè dir – part dal mintgadi en il Grischun. Gist lufs-tscherver e lufs vivan dapi onns en il Grischun. La rotscha lufs dal Calanda ha tratg si cun success il terz onn lufins ed ins fa quint cun lufs giuvens er quest onn. Oravant tut animals da niz betg protegids vegnan stgarpads regularmain dapi onns. Quai signifitga grondas sfidas per l'agricultura. I vala da proteger las nursas e las chauras per ch'ina tratga d'animals cun success possia vegnir pratitgada vinavant e per che las pastgiras d'alp vegnian duvradas en l'avegnir.

Resguardar las reglas da cumportament

In chaun da protecziun da muntaneras po d'ina vart esser charin e patgific. Ma ins sto savair: sch'ins sa cumporta en moda faussa, po el er morder. El pertgira sia muntanera di e notg cunter animals esters. Tar ina scuntrada vul quai dir per l'uman da vegnir giu dal velo da muntogna, da franar, da laschar passar temp, d'evitar moviments hectics u schizunt da star salda per ch'il chaun da protecziun possia valitar en paus l'uman. Savens basta quai gia per pudair viandar senza conflicts per lung da la muntanera. Sch'il chaun n'avess tuttina betg da tolerar la preschientscha da l'uman, sto quel respectar quai e returnar.

Cussegliaziun, scolaziun ed engaschament renconuschì uffizialmain

Actualmain vegnan stgars 25 muntaneras protegidas da chauns da protecziun en il Grischun, e quest dumber crescha dad onn ad onn. Per pudair profitar cun success dals chauns da protecziun dovri tschertas enconuschientschas preliminaras, ed il manaschi sto vegnir preparà correspundentamain. Per cussegliar, scolar ed accumpagnar ils purs en il chantun Grischun è responsabel il Plantahof. In fin dus onns suenter ch'il pur è vegnì cusseglià ed ha absolvì la scolaziun ensemen cun il chaun, è il manaschi pront per surdar sia muntanera a la tgira dals chauns da protecziun. En quest cas conceda il chantun ina permissiun per tegnair quests chauns, uschia ch'els adempleschan lur funcziun per proteger muntaneras cunter animals esters cun ina legitimaziun legala. Quai vegn er promovì finanzialmain da la confederaziun.

Il chantun Grischun observa cuminaivlamain ils interess da la protecziun da las spezias, da la segirezza publica, da l'agricultura, dal turissem e da la chatscha e persequitescha ina via pragmatica cun realisar sia incumbensa.


Infurmaziuns:

Jan Boner, incumbensà per la protecziun da las muntaneras al Plantahof, tel: 079 699 82 12, e-mail: hundewesen@plantahof.gr.ch  


Gremi: Plantahof
Funtauna: rg Plantahof
Neuer Artikel