Zum Seiteninhalt

La cumissiun per economia e taxas ha predeliberà trais fatschentas per mauns dal cussegl grond

  • Erste Mitteilung
  • Neuen Beitrag einfügen
La cumissiun dal cussegl grond per economia e taxas ha predeliberà las missivas da la regenza tar la revisiun totala da la lescha per promover il svilup economic en il chantun Grischun (lescha davart il svilup economic), tar la revisiun parziala da la lescha davart la banca chantunala grischuna e tar la revisiun parziala da la lescha da taglia. Ella propona al cussegl grond d'approvar tuts trais projects.

Revisiun totala da la lescha davart il svilup economic

La cumissiun dal cussegl grond per economia e taxas (CET) ha predeliberà en pliras sesidas – sut il presidi dal president da la cumissiun Urs Marti ed en preschientscha dal cusseglier guvernativ Jon Domenic Parolini, schef dal departament d'economia publica e fatgs socials – la missiva tar la revisiun totala da la lescha per promover il svilup economic en il chantun Grischun per mauns dal cussegl grond.
Cun plaschair ha la CET prendì enconuschientscha dal fatg che la revisiun totala da la lescha davart il svilup economic è vegnida prendida svelt per mauns en vista a las difficultads economicas. Cun in sguard sin il rapport davart il svilup economic ch'è vegnì tractà dal cussegl grond en la sessiun da december 2014 remartga ella che sulettamain la lescha davart il svilup economic na tanscha betg per promover il chantun Grischun. Qua èsi necessari d'agir anc en differents auters secturs politics.
La CET è entrada unanimamain en il project e recumonda al cussegl grond – cun paucas midadas formalas – d'acceptar la missiva. Spezialmain la renunzia a la promoziun da singulas interpresas sco er la promoziun da l'innovaziun tras la nova lescha empè tras la fundaziun d'innovaziun han chattà unanimitad en la cumissiun.

Revisiun parziala da la lescha davart la banca chantunala grischuna
Plinavant ha la CET predeliberà la missiva da la regenza tar la revisiun parziala da la lescha davart la banca chantunala grischuna. En preschientscha dal president da la cumissiun Urs Marti e da la cussegliera guvernativa Barbara Janom Steiner, scheffa dal departament da finanzas e vischnancas, ha la cumissiun deliberà oravant tut l'execuziun dal dretg surordinà per mauns dal cussegl grond. L'entrada en la materia è stada gist uschè incontestada sco l'approvaziun dal project. Spezialmain ha ella dà ses consentiment ad ina midada da la lescha, cun la quala vegn abolì il motiv d'exclusiun vertent per persunas che lavuran per in'autra interpresa suttamessa a la lescha da bancas. L'unica proposta da midada ch'è vegnida preschentada d'ina maioritad da la cumissiun concerna la durada d'uffizi. Tenor l'opiniun da questa maioritad da la cumissiun duai vegnir renunzià a la pussaivladad da prolungar la durada d'uffizi da 12 onns per ulteriurs 4 onns en cas excepziunals motivads.

Revisiun parziala da la lescha da taglia

La terza fatschenta che la CET ha predeliberà per mauns dal cussegl grond è la revisiun parziala da la lescha chantunala da taglia. Er questa fatschenta è stada sut la direcziun dal president da la cumissiun Urs Marti ed è vegnida tractada en preschientscha da la cussegliera guvernativa Barbara Janom Steiner. La cumissiun è entrada unanimamain en il project. Suenter ina debatta pli lunga ha ella decidì d'integrar en la revisiun parziala – sco punct da discussiun – ina reducziun da la valur da l'atgna locaziun suttamessa a la taglia, e quai a 60 pertschient. Quest proceder tegna quint d'in giavisch ch'è vegnì surdà a la regenza tras ina incumbensa l'avrigl 2014 e che pretenda ina reducziun da la taxaziun da la valur da l'atgna locaziun. Sche la valur da l'atgna locaziun vegniss però reducida a 60 pertschient, stuess la regenza reducir sin il stgalim da l'ordinaziun – pervia da la giurisdicziun surordinada – la deducziun pauschala per il mantegniment da 20 pertschient a 10 pertschient e far ultra da quai adattaziuns da la stimaziun che chaschunassan blera lavur administrativa. Perquai ch'i pudess vegnir fatg quint tar quest proceder a favur dals possessurs d'atgna proprietad en tut il chantun en il meglier cas cun ina reducziun da 2 pertschient da la valur da l'atgna locaziun, desista la cumissiun unanimamain da prender per mauns questa procedura che chaschuna pli blera lavur e che porta paucs respargns. Cun quai sustegna ella l'opiniun da la regenza da betg adattar questa disposiziun.
Dal rest ha ina minoritad da la cumissiun fatg la proposta da renunziar ad ina pauschalisaziun da la deducziun dals custs da viadi e da restar tar la regulaziun vertenta (deducziun dals custs effectivs). La CET recumonda al cussegl grond d'acceptar er questa fatschenta.

Il cussegl grond vegn a tractar tuttas trais fatschentas en la sessiun d'avust 2015.


Infurmaziuns:
president da la cumissiun Urs Marti, tel. 081 254 41 00


Gremi: cumissiun per economia e taxas
Funtauna: rg cumissiun per economia e taxas
Neuer Artikel