Zum Seiteninhalt

La cumissiun dal cussegl grond beneventa la construcziun d'in nov stabiliment giudizial serrà a Realta

  • Erste Mitteilung
  • Neuen Beitrag einfügen
La cumissiun predeliberanta dal cussegl grond ha tractà la missiva da la regenza davart la construcziun d'in nov stabiliment giudizial serrà a Realta. Ella recumonda al cussegl grond d'approvar il project sco er il credit d'impegn necessari.

En la sessiun d'avust 2015 vegn il cussegl grond a debattar davart il credit d'impegn per la construcziun d'in nov stabiliment giudizial serrà a Realta, Cazas. Sut il presidi dal deputà Hans Geisseler ed en preschientscha dal cusseglier guvernativ Christian Rathgeb ha la cumissiun predeliberanta dal cussegl grond tractà la missiva da construcziun correspundenta da la regenza.

Basegn cumprovà
La sesida ha gì lieu en ils mirs dal stabiliment per l'execuziun giudiziala Sennhof a Cuira. Uschia han las commembras ed ils commembers da la cumissiun pudì sa far al lieu in maletg dal stadi actual en l'execuziun serrada. La situaziun architectonica e manaschiala en il Sennhof cun sias 57 plazzas è daventada insuffizienta suenter in manaschi da var 200 onns. Questa circumstanza sco er il fatg, ch'i mancan var 140 plazzas en l'execuziun da chastis e da mesiras serrada en il rom dal concordat dals chantuns da la Svizra orientala davart l'execuziun da chastis e da mesiras, han persvadì la cumissiun che la proposta da la regenza da construir in nov stabiliment giudizial serrà cun 152 plazzas a Realta è gista ed impurtanta per il chantun Grischun. Correspundentamain è la cumissiun entrada unanimamain en il project.

Credit d'impegn dad 86 milliuns francs

Ils custs per construir in nov stabiliment giudizial serrà a Realta muntan a 119 milliuns francs. Da quels surpiglia la confederaziun var 33 milliuns francs. Pia importan ils custs da construcziun nets per il chantun 86 milliuns francs. Perquai ch'il cussegl grond procura tenor il dretg vertent en atgna cumpetenza per la construcziun e per il mantegniment d'instituziuns da l'execuziun da chastis e da mesiras, n'è il credit d'impegn per quests 86 milliuns francs betg suttamess al referendum da finanzas.

Da la construcziun dal nov stabiliment giudizial profitassan la regiun ed il chantun: Il nov stabiliment giudizial a Realta dess lavur a 110 collavuraturas e collavuraturs, 80 da quellas plazzas stuessan vegnir occupadas da nov. Ultra da quai sa meglierass il quint da gestiun probablamain per 3,4 milliuns francs per onn envers la situaziun actuala, e quai grazia als avantatgs da grondezza e grazia a dapli entradas da dunsena dals chantuns dal concordat dals chantuns da la Svizra orientala davart l'execuziun da chastis e da mesiras, ils quals collocheschan praschuniers a Realta.

La cumissiun predeliberanta propona unanimamain al cussegl grond d'approvar il project da construcziun sco er da conceder il credit d'impegn necessari.


Infurmaziuns:

president da la cumissiun Hans Geisseler, tel. 079 798 26 69


Gremi: cumissiun predeliberanta per la construcziun d'in nov stabiliment per l'execuziun giudiziala Realta
Funtauna: rg cumissiun predeliberanta per la construcziun d'in nov stabiliment per l'execuziun giudiziala Realta
Neuer Artikel