Navigation

Inhaltsbereich

  • Erste Mitteilung
  • Neuen Beitrag einfügen
En sia ultima sesida prenda la regenza enconuschientscha da las colliaziuns da glistas per las elecziuns dal cussegl naziunal e posiziun davart la midada da la lescha federala davart l'assicuranza da malsauns.

Colliaziuns da glistas per las elecziuns dal cussegl naziunal 2015
Per las elecziuns dal cussegl naziunal dals 18 d'october 2015 èn vegnidas inoltradas trais colliaziuns da glistas en il chantun Grischun. La regenza ha oz prendì enconuschientscha da quest fatg.

Colliaziuns da glistas:
  • glista nr. 1 (PLD.Ils Liberals GR Glista economia) cun glista nr. 2 (PCD – ils giuvens), cun glista nr. 8 (PLD.Ils Liberals GR Glista liberala), cun glista nr. 10 (PLD.Ils Liberals GR Ils giuvens), cun glista nr. 11 (PCD dal Grischun), cun glista nr. 12 (PBD dal Grischun) e cun glista nr. 14 (Giuvna PBD dal Grischun);
  • glista nr. 4 (PS partida socialdemocratica) cun glista nr. 6 (PS GiuvnAs socialistAs (GS) e cun glista nr. 13 (Verd liberals);
  • glista nr. 3 (Giuvna PPS dal Grischun) cun glista nr. 5 (PPS Grischun B), glista nr. 7 (PPS Grischun M), glista nr. 9 (PPS Internaziunala) e cun glista nr. 15 (Democrats patriotic-liberals).
Sutcolliaziuns da glistas:
  • glista nr. 1 (PLD.Ils Liberals GR Glista economia) cun glista nr. 8 (PLD.Ils Liberals GR Glista liberala) e cun glista nr. 10 (PLD.Ils Liberals GR Ils giuvens);
  • glista nr. 2 (PCD – ils giuvens) cun glista nr. 11 (PCD dal Grischun);
  • glista nr. 12 (PBD dal Grischun) cun glista nr. 14 (Giuvna PBD dal Grischun);
  • glista nr. 4 (PS partida socialdemocratica) cun glista nr. 6 (PS GiuvnAs socialistAs (GS);
  • glista nr. 5 (PPS Grischun B) cun glista nr. 7 (PPS Grischun M).   

Ina survista detagliada incl. ils nums da las singulas candidatas e dals singuls candidats sco er las colliaziuns da glistas stattan a disposiziun en l'internet sut www.gr.ch – Publikationen – Abstimmungen und Wahlen – Nationalratswahlen 2015 – Kandidatenlisten.


La regenza beneventa la midada da la lescha federala davart l'assicuranza da malsauns
La regenza grischuna sustegna la midada da la lescha federala davart l'assicuranza da malsauns (LAMal) concernent la realisaziun da l'iniziativa parlamentara "LAMal. Dapli autonomia per il persunal da sanadad".
L'iniziativa vul che las persunas responsablas per la tgira possian lavurar ed agir en il futur en moda pli independenta. Las persunas responsablas per la tgira na duain betg pli furnir ina part da las prestaziuns da tgira sin urden u per incarica d'ina media u d'in medi, mabain duain avair directamain access a las pazientas ed als pazients. Quai vala tant en l'ospital sco er per persunas responsablas per la tgira che lavuran independentamain e sin agen quint, per emploiadas ed emploiads d'ina chasa da tgira u per emploiadas ed emploiads d'ina organisaziun da la tgira da malsauns e da l'agid a chasa. La midada da lescha proponida augmenta l'attractivitad da la professiun da tgira e gida uschia a satisfar meglier al basegn da tgira che crescha ad in crescher.

Il project "protecziun cunter crudada da crappa Il Crap" a Bravuogn vegn approvà
La regenza approvescha il project "protecziun cunter crudada da crappa Il Crap" da la vischnanca da Bravuogn e conceda ina contribuziun chantunala da maximalmain 1 222 500 francs.
Il territori dal project sa chatta al nordvest dal vitg da Bravuogn sur la via da l'Alvra. In'analisa dals privels ha mussà che la via chantunala è periclitada là tras crudadas da crappa. Il project duai ussa garantir la protecziun da la via chantunala. Per quest intent vegnan construidas raits cunter crudada da crappa d'ina lunghezza totala da 504 meters sco er in rempar da retegnida da 25 meters. Il project vegn realisà en duas etappas da construcziun. Il project duai vegnir terminà l'onn 2016.

-

© DIAG Davoser Ingenieure AG


Gremi: regenza
Funtauna: rg chanzlia chantunala dal Grischun  
Neuer Artikel