La regenza grischuna ha deliberà la missiva tar la revisiun parziala da la lescha davart l'organisaziun giudiziala per mauns dal cussegl grond. Las dretgiras districtualas actualas vegnan transferidas en dretgiras regiunalas sco dretgiras chantunalas inferiuras.
Suenter ch'il pievel grischun ha approvà ils 30 da november 2014 la legislaziun executiva tar la refurma dal territori, suonda ussa sco segunda etappa la restructuraziun parziala da las dretgiras grischunas. Uschia vegn concretisada anc ina giada la refurma dal territori ch'il pievel grischun aveva concludì ils 23 da settember 2012 approvond ina revisiun parziala da la constituziun chantunala. Per statuir las dretgiras regiunalas sco dretgiras chantunalas inferiuras sto la lescha davart l'organisaziun giudiziala vegnir suttamessa ad ina revisiun parziala.
Las 11 dretgiras districtualas d'enfin ussa vegnan transfurmadas en 11 dretgiras regiunalas. Empè da las dretgiras districtualas exequeschan ellas en l'avegnir la giurisdicziun civila e penala sco dretgiras chantunalas inferiuras. Tras la chantunalisaziun daventan las dretgiras regiunalas ina part directa da la corporaziun territoriala dal chantun Grischun. Areguard las garanzias constituziunalas da l'independenza e da l'imparzialitad da las dretgiras na datti naginas midadas.
Nagina influenza n'ha la refurma da las dretgiras sin la nominaziun da las derschadras e dals derschaders da las dretgiras regiunalas. Questas persunas ston vegnir elegidas da las votantas e dals votants da la regiun respectiva en il decurs da l'onn 2016. La perioda d'uffizi cumenza directamain suenter la perioda d'uffizi da las derschadras districtualas e dals derschaders districtuals actuals; quellas e quels restan en uffizi fin la fin da l'onn 2016.
Il cussegl grond vegn a tractar questa fatschenta en la sessiun d'october 2015. Las midadas duain entrar en vigur il 1. da schaner 2017.
Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail
Christian.Rathgeb@djsg.gr.ch
Gremi: regenza
Funtauna: rg chanzlia chantunala dal Grischun