Cuntegn da la pagina

Dapli segirezza grazia a cussegliaders locals da privels da la natira

  • Erste Mitteilung
  • Neuen Beitrag einfügen
Ils donns da malaura pon vegnir limitads, sch'i vegn agì a temp e correctamain al lieu. Dapi quasi dus onns vegnan scolads cussegliaders da privels da la natira. Ils emprims experts vegnan ussa integrads en ils stabs directivs da las vischnancas.

Las grevas malauras dals onns 2005 a Claustra e 2002 en la Surselva èn anc adina en buna memoria. Quella giada hai dà gronds donns materials en territoris da privel enconuschents. Sch'i fiss vegnì avertì a temp e sch'ins avess intervegnì cun cleras finamiras, avessan quels pudì vegnir limitads. Il chantun ha analisà quests dus eveniments sco er ulteriurs cas da donn ed ha renconuschì ch'i dat in basegn d'agir concret per valitar e per dumagnar al lieu ils eveniments da la natira extraordinaris.

Las vischnancas èn dumandadas
Las vischnancas èn responsablas per la segirezza da la populaziun locala. Ellas han la responsabladad da sa preparar per eventuals eveniments en situaziuns spezialas ed extraordinarias e per prender la prevenziun necessaria. La scolaziun dals cussegliaders da privels da la natira vegn pia beneventada fitg da las vischnancas.

Sco cussegliader da privels da la natira (CPN) vegnan instruidas persunas dal stgalim communal, che han fitg bunas enconuschientschas dal lieu. Per regla sa tracti dals selviculturs da revier, dals manaders da lavuratoris u da spezialists ch'èn gia confruntads professiunalmain cun privels da la natira. Da lur incumbensas fa part l'avertiment a temp util da las forzas directivas e d'acziun, sch'i smanatschan eveniments da la natira. A medem temp cusseglian quests experts las autoritads responsablas.

Coordinar la scolaziun e l'organisaziun
Dapi dus onns organisescha il chantun curs da scolaziun per futurs cussegliaders da privels da la natira. En curs da quatter dis, repartids sur dus onns, vegnan intermediadas las enconuschientschas da basa davart l'aura ed ils privels da la natira, dentant er davart ils documents da privel ch'èn avant maun sco las chartas d'intervenziun u da privel. Ils participants vegnan plinavant rendids famigliars cun l'organisaziun da las forzas d'acziun da la polizia e dals pumpiers, cun ils servetschs da la protecziun civila sco er cun la constituziun e cun la moda da lavurar dals stabs directivs communals. Cun quai po in cussegliader local da privels da la natira – integrà organisatoricamain en il stab directiv communal – infurmar e cussegliar svelt ed en moda confurma a la materia ed a la situaziun.

Ils motivs per donns en cas da malauras ston vegnir tschertgads tar ils privels da la natira e tar lur svilup, ma er tar las intervenziuns architectonicas en la cuntrada. Sche per exempel in aual va surora, pon intervenziuns sistematicas impedir donns pli gronds. Per quest intent elavura il management chantunal da privels da la natira dapi onns chartas da privel e d'intervenziun. L'applicaziun adequata e l'integraziun da las infurmaziuns actualas qualifitgeschan il cussegliader local da privels da la natira – tenor la concepziun da la lescha davart la protecziun da la populaziun en il chantun Grischun, ch'è vegnida relaschada dal cussegl grond ils 16 da zercladur 2015 – da daventar in anè da la chadaina per dapli segirezza envers privels da la natira.


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch
- Christian Wilhelm, schef da secziun privels da la natira, uffizi da guaud e privels da la natira, tel. 081 257 38 52, e-mail: Christian.Wilhelm@awn.gr.ch


Gremi: uffizi da guaud e privels da la natira
Funtauna: rg uffizi da guaud e privels da la natira
Neuer Artikel